AQSH Sog‘liqni saqlash va ijtimoiy xizmatlar vazirligi rahbari kichik Robert Kennedi sog‘liqni saqlash tizimini umumiy qayta qurish doirasida 10 ming xodimni qisqartirish rejalashtirilayotganini e’lon qildi. Bu haqda MarketWatch xabar bermoqda.
Sog‘liqni saqlash vazirligi rahbari o‘zining videomurojaatida vazirlik va uning tasarrufidagi bo‘linmalar samarasiz ishlayotganini ta’kidlagan.
Kennedining aytishicha, qayta tashkil etish natijasida vazirlik bo‘linmalari soni 28 tadan 15 taga qisqartiriladi, beshta mintaqaviy bo‘lim esa yopiladi.
Vazirlikning umumiy xodimlar sonini taxminan chorak qismga — 82 mingdan 62 minggacha qisqartirish rejalashtirilmoqda. Donald Tramp prezidentlik lavozimiga kirishganidan so‘ng, 10 mingga yaqin xodim sog‘liqni saqlash tuzilmalarini o‘z ixtiyori bilan tark etgan.
Wall Street Journal gazetasi ma’lumotlariga ko‘ra, yangi qisqartirishlar, xususan, Oziq-ovqat va dori-darmonlar sifatini nazorat qilish boshqarmasiga ta’sir qilishini, u yerda 3,5 ming xodim (taxminan 19 foiz xodimlar), kasalliklarni nazorat qilish va oldini olish markazlarida 2,4 ming (18 foiz xodimlar), shuningdek, milliy sog‘liqni saqlash institutlarida 1,2 ming (6 foiz xodimlar) ishdan bo‘shatilishi rejalashtirilmoqda.
Islohotlarning asosiy vazifalaridan biri hozirda Sog‘liqni saqlash vazirligining bo‘limlari va hatto filiallari o‘rtasida taqsimlangan aloqalar, xaridlar, kadrlar, IT-resurslar va siyosatni rejalashtirish funksiyalarini markazlashtirishdir.
WSJ havola qilgan hujjatlarda ta’kidlanishicha, bu qayta tashkil etish muhim tibbiy xizmatlarni ko‘rsatishga ta’sir qilmaydi.
Izoh (0)