Grenlandiyaliklar AQSH prezidenti Donald Trampning orolni qo‘shib olish haqidagi bayonotlariga norozilik bildirish maqsadida Amerika mahsulotlarini boykot qilishni boshladi. Bu haqda KNR mahalliy radiostansiyasi xabar qilmoqda.
Radiostansiya ma’lumotlariga ko‘ra, Facebook ijtimoiy tarmog‘ida “Grenlandiyada Amerika tovarlarini boykot qiling” nomli guruh ochilgan bo‘lib, unga 4-martdan beri 1700 dan ortiq kishi a’zo bo‘lgan. “AQSH tovarlarini boykot qiling” deb nomlangan Daniya guruhi esa allaqachon 89 mingdan ziyod a’zoga ega.
“Biz Amerika ma’muriyatiga hozirgi vaziyatdan mamnun emasligimizni ko‘rsatishimiz zarur. Shuningdek, Donald Trampning bayonotlariga qarshi noroziligimizni bildirish lozim”, deydi guruhlardan birining asoschisi, grenlandiyalik Minik Langen.
Langening aytishicha, orol aholisining Amerika mahsulotlarini sotib olishdan voz kechishi “sokin norozilik”ka aylanishi mumkin. Guruh asoschisi ko‘proq Yevropa yoki Kanada mahsulotlarini xarid qilishni taklif etmoqda.
Fevral oyining oxirida Guardian gazetasi xabar qilishicha, kanadaliklar Vashington tomonidan joriy etilayotgan bojlar va Amerika rahbari Donald Trampning Kanadani AQSHning 51-shtatiga aylantirish tahdidlari sababli Amerika mahsulotlarini boykot qilishni boshlagan.
11-mart kuni Grenlandiyada parlament saylovlari bo‘lib o‘tdi. Endi deputatlarning yangi tarkibi Daniyadan mustaqillik bo‘yicha referendum o‘tkazish masalasini hal qilishi mumkin. Bu masala Trampning orolni AQSHga qo‘shib olish istagi haqidagi bayonotlaridan so‘ng ko‘tarildi. Grenlandiyadagi bironta siyosiy partiya ham, aholining mutlaq ko‘pchiligi ham AQSHga qo‘shilishni qo‘llab-quvvatlamaydi. Aksincha, barcha siyosatchilar qat’iy mustaqillik tarafdori: na Daniya, na AQSH.
Mart oyida AQSH prezidenti Donald Tramp Grenlandiya “baribir” AQSH nazoratiga o‘tishini aytdi va orol aholisi Qo‘shma Shtatlarga qo‘shilsa, boyib ketishini va’da qildi.
Ma’lumot uchun, Grenlandiya 1953-yilgacha Daniyaning mustamlakasi bo‘lgan. U hamon qirollikning bir qismi hisoblanadi, biroq 2009-yilda o‘zini o‘zi boshqarish va ichki siyosatda mustaqil qaror qabul qilish huquqi bilan avtonomiya olgan.
Izoh (0)