АҚШ президенти Дональд Трамп мусулмон жамоаси вакиллари ва қатор мусулмон давлатлари дипломатлари учун Оқ уйда ифторлик уюштирди. Бу ҳақда Anadolu хабар берди.
Бу Трампнинг иккинчи президентлик муддатидаги биринчи маротаба ташкил этилган ифторлиги бўлди. У нутқини “Рамазон ойи муборак бўлсин” деган сўзлар билан бошлади ва 2024 йил ноябрь ойида бўлиб ўтган президентлик сайловларида АҚШдаги мусулмонларнинг қўллаб-қувватлови уни хурсанд қилганини айтди.
Трамп тадбирда Саудия Арабистони, Миср, БАА, Қатар, Ливан, Покистон ва бошқа давлатлар вакиллари иштирок этаётганини маълум қилди.
2024 йилги президентлик сайловларида мени рекорд даражада қўллаб-қувватлаган юз минглаб мусулмон америкаликларга алоҳида миннатдорлик билдирмоқчиман. Бу ақл бовар қилмайдиган ҳолат эди, деди АҚШ президенти.
Сиёсатчининг таъкидлашича, Оқ уй маъмурияти мусулмон ҳамжамиятига берган ваъдаларини бажаришда давом этмоқда.
Биз тарихий Иброҳим келишувларига таянган ҳолда, Яқин Шарқда узоқ муддатли тинчлик ўрнатиш учун дипломатик фаолият олиб бормоқдамиз, деди у.
Шунингдек, АҚШ президенти Мичиган штатида истиқомат қилаётган мусулмонларга алоҳида миннатдорлик билдирди.
Мен президент бўлиб қолар эканман, сизлар билан бирга бўламан. Сизни қўллаб-қувватлайман. Буни билишингизни истайман, деди у.
Трамп мусулмонларни муқаддас рамазон ойи бошланиши билан ҳам табриклаган эди. Ўшанда у ўз маъмуриятининг “Америка турмуш тарзининг ажралмас қисми бўлган диний эркинликни ҳимоя қилишга содиқлигини” таъкидлаган.
Маълумот ўрнида, Ўзбекистонда рамазон ойи 1 мартдан бошланганди. 2025 йилги Рамазон ҳайити 30 март куни нишонланиши 26 март куни эълон қилинди. Меҳнат кодексининг 208-моддасига мувофиқ ишланмайдиган байрам куни ҳисобланувчи Рамазон ҳайитининг биринчи куни 2025 йилда якшанба — дам олиш кунига тўғри келиши муносабати билан ушбу дам олиш куни 31 март — душанба кунига кўчирилади.
Бунда ишлаб чиқариш-техник ва ташкилий шароитлар (мавжуд узлуксиз ишлаб чиқариш, аҳолига ҳар куни хизмат кўрсатиш, навбатчилик асосида ишлаш ва бошқалар) туфайли ишланмайдиган байрам кунлари тўхтатиб қўйиш мумкин бўлмаган ишларни бажаришда дам олиш кунлари кўчирилмайди.
Изоҳ (1)
МУНОФИҚ ДЕБ КИМЛАРНИ АЙТИШАРДИ ?