Sirdaryo va Navoiy viloyatlarida AQSH davlatiga ishga yuborishni va’da qilgan shaxslar ushlandi, deb xabar bermoqda Prokuratura departamenti.
Ma’lum qilinishicha, Bosh prokuratura huzuridagi departamentning Shirin shahri bo‘limi va DXX xodimlari hamkorligida tezkor tadbir o‘tkazilgan. Tadbirda fuqaro F.R. fuqaro M.X.ning ishonchiga kirib, o‘zi va uning tanishini 38 ming AQSH dollari evaziga AQSHga ishga yuborishi va viza olib berishini aytib, kelishilgan pullar hisobidan 52 mln so‘mni olgan vaqtida ashyoviy dalillar bilan ushlangan.
Shu kabi departamentning Navoiy shahri bo‘limi, DXX va IIB xodimlari hamkorligida tezkor tadbir o‘tkazilgan. Fuqaro M.A. (muqaddam firibgarlik jinoyati uchun sudlangan) fuqaro L.Q.ning ishonchiga kirib, uni Meksika davlati orqali AQSHga ishga yuborishi evaziga 14 ming AQSH dollarini olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 25, 168-moddasi (firibgarlik) bilan jinoyat ishlari qo‘zg‘atilib, tergov harakatlari o‘tkazilmoqda.
Toshkentning Chilonzor tumanida AQSHga ishga yuborish uchun 40 ming dollar olgan shaxs ushlangandi. O‘zbekistondan AQSHga noqonuniy borish bilan bog‘liq firibgarlik holatlari haqida xabar berilishiga qaramay, bunday holatlar tez-tez qayd etilmoqda.
AQSHning O‘zbekistondagi elchixonasi noqonuniy migratsiya xavfli va serxarajat urinish ekanini bildirib, O‘zbekiston fuqarolarini odamlarni tovar sifatida ko‘radigan jinoiy guruhlar yolg‘on vaʼdalariga ishonib, jabrdiyda bo‘lishdan ogohlantirgan.
2024-yilda AQSH hukumati 572 o‘zbekni deportatsiya qilgan. AQSHdan deportatsiya qilinadigan O‘zbekiston fuqarolari soni 975 kishini tashkil etmoqda. Tramp noqonuniy migrantlarning Meksika orqali kirishini taqiqladi.
Izoh (0)