UFC’ning ikki karra chempioni Konor Makgregor Donald Tramp bilan uchrashuvdan so‘ng Irlandiya prezidentligiga nomzod bo‘lish niyatini bildirdi. Bu haqda u o‘zining X ijtimoiy tarmog‘idagi sahifasida ma’lum qilgan.
Uning aytishicha, dasturining asosiy yo‘nalishi Yevropa ittifoqining migrantlarni YeI mamlakatlariga bir tekis taqsimlashni ko‘zda tutuvchi migratsiya paktiga qarshi kurash bo‘ladi.
Makgregor bu masalani referendumga qo‘yishni va’da qilib, qaror Irlandiya xalqiga tegishli bo‘lishi lozimligini ta’kidlagan.
“Prezident bo‘lganimda, bu qonun loyihasini referendumga qo‘ygan bo‘lardim. Garchi men bu paktga qat’iyan qarshi bo‘lsam-da, tanlov na menga, na davlatga bog‘liq bo‘lmasligi kerak. Bu Irlandiya xalqining tanlovi! Doimo shunday! Mana bu - haqiqiy demokratiya!”, deydi sportchi.
Shuningdek, u noqonuniy migratsiya borasidagi vaziyat uchun amaldagi hukumatni keskin tanqid qilib, ayrim shaharlarda irlandiyaliklar allaqachon ozchilikka aylanib qolganini ta’kidlagan.
Ilgari Makgregor Oq uyda so‘zlagan nutqida Irlandiya hukumatini noqonuniy migratsiya ustidan nazoratni yo‘qotgani uchun tanqid qilgan va ba’zi shaharlarda oq tanli aholi ozchilikni tashkil etib qolganini aytgan edi.
Izoh (0)