Daniya hukumati ayollar uchun majburiy harbiy xizmatni joriy etmoqda, 18 yoshga to‘lganlar iyul oyidan xizmatga chaqirilishi mumkin. Bu haqda qirollik mudofaa vaziri Troels Lund Poulsenga tayanib, Deutsche Welle xabar berdi.
Mudofaa siyosati va xavfsizlik sohasidagi hozirgi vaziyatni hisobga olgan holda, qurolli kuchlar yangi askarlarni ko‘proq jalb qilishi kerak, dedi u.
Vazirning so‘zlariga ko‘ra, 2025-yil 1-iyuldan boshlab harbiy xizmatga chaqirish masalasida erkaklar va ayollar o‘rtasida to‘liq tenglikka erishish muhim signal bo‘ladi.
Dastlab daniyalik ayollar 2027-yildan boshlab harbiy xizmatga chaqirilishi rejalashtirilgan edi. Xuddi shu qarorda majburiy harbiy xizmat muddati to‘rt oydan 11 oyga uzaytirildi. Ayni paytda ayollar Daniya qurolli kuchlarida faqat ko‘ngilli asosda xizmat qilmoqda.
Mamlakatda majburiy harbiy xizmatga chaqiruv faqat yetarli miqdordagi ko‘ngillilar to‘plangan taqdirdagina amalga oshiriladi. Kimlar chaqirilishi har yili o‘tkaziladigan lotereya orqali aniqlanadi, deb yozadi AFP.
Daniya mudofaa byudjetini kengaytirmoqda
Fevral oyida Mette Frederiksen hukumati Ukrainaga qarshi urush olib borayotgan Rossiya tahdidining kuchayishi sababli joriy va kelgusi yillar uchun mudofaa byudjetini jami 6,8 milliard yevroga oshirishini e’lon qildi.
Biz agressiv Rossiya bilan ish olib bormoqdamiz, u qayta qurollanmoqda va uch oy ichida NATOga qaraganda ko‘proq o‘q-dori ishlab chiqarmoqda, dedi bosh vazir Frederiksen.
Bundan tashqari, so‘nggi oylarda AQSH prezidenti Donald Tramp ma’muriyatining Grenlandiyani anneksiya qilish istagi haqidagi bayonotlari fonida Daniya va AQSH o‘rtasidagi kelishmovchiliklar keskinlashdi.
Izoh (0)