Prezidentning “Muborak Ramazon hayitini nishonlash to‘g‘risida”gi qarori qabul qilindi. Bu haqda Prezident matbuot xizmati xabar berdi.
Qarorga ko‘ra, O‘zbekistonda 2025-yil 30-mart kuni Ramazon hayiti bayrami sifatida keng nishonlanadi.
Mehnat kodeksining 208-moddasiga muvofiq ishlanmaydigan bayram kuni hisoblanuvchi Ramazon hayitining birinchi kuni 2025-yilda yakshanba – dam olish kuniga to‘g‘ri kelishi munosabati bilan ushbu dam olish kuni 31-mart – dushanba kuniga ko‘chiriladi.
Bunda ishlab chiqarish-texnik va tashkiliy sharoitlar (mavjud uzluksiz ishlab chiqarish, aholiga har kuni xizmat ko‘rsatish, navbatchilik asosida ishlash va boshqalar) tufayli ishlanmaydigan bayram kunlari to‘xtatib qo‘yish mumkin bo‘lmagan ishlarni bajarishda dam olish kunlari ko‘chirilmaydi.
O‘zbekistonda ramazon oyi 1-martdan boshlangandi. Ramazonda O‘zbekistondagi 2100 dan ortiq masjidda tarovih namozi o‘qilmoqda, 1740 dan ortig‘ida Qur’oni Karim xatm qilinmoqda. O‘zbekiston musulmonlari idorasi Fatvo markazi 2025-yil uchun zakot, fitr sadaqa va fidya miqdorini e’lon qilgan.
O‘zbekistondan avval Qozog‘iston, Qirg‘iziston va Tojikistonda 2025-yilgi ramazon oyi 29 kun davom etishi va Ramazon hayiti 30-mart kuni nishonlanishi e’lon qilindi.
2024-yilda Ramazon hayiti 10-aprelga to‘g‘ri kelgandi.
Izoh (0)