Turkiyada Istanbul meri Akram Imomo‘g‘li qamoqqa olinganidan so‘ng ommaviy norozilik namoyishlari boshlangan edi. Mamlakatda faoliyat olib borayotgan telekanallarga mazkur namoyishlarni yoritish taqiqlandi.
Turkiya radio va televideniye oliy kengashi raisi Abubakir Shohin norozilik namoyishlarini to‘g‘ridan-to‘g‘ri efirga uzatishni to‘xtatishni talab qilgan. Aks holda bunday telekanallar litsenziyadan mahrum etiladi. Shohin namoyishlarni yoritish “bosiq”, “xolis” bo‘lishi va “hokimiyatning rasmiy ma’lumotlari hamda tushuntirishlari”ni o‘z ichiga olishi kerakligini ta’kidlagan.
Shundan so‘ng TRT Haber, NTV va CNN Turk kabi kanallar namoyishlar to‘g‘ridan-to‘g‘ri efirga uzatishni to‘xtatgan. Ular siyosatchilarning nutqlari va fikrlarini orqali mitinglarni yoritishni davom ettirmoqda. Turkiya hukumati avvalroq X, YouTube, Instagram va TikTok platformalariga kirishni cheklagan edi. X kompaniyasi esa ba’zi turk muxolifatchilarining akkauntlarini o‘zi bloklagan.
Turkiyada norozilik namoyishlari prezidentlik saylovlarida Erdo‘g‘onning raqibi bo‘lishi kutilayotgan 54 yoshli Imomo‘g‘li 19-mart kuni qo‘lga olinganidan keyin boshlandi. Namoyishlar Anqara, shuningdek, Istanbul, Izmir, Adana, Antaliya, Konya va boshqa bir qator shaharlarda bo‘lib o‘tmoqda.
Ularda 550 mingga yaqin kishi ishtirok etmoqda. 23-mart kuni ichki ishlar vaziri Ali Yerlikaya 323 nafar namoyishchi qo‘lga olingani haqida hisobot berdi. Bir kun oldin bu ko‘rsatkich 343 kishini tashkil etgan. Istanbul, Anqara va Izmirda politsiya namoyishchilarga qarshi ko‘zdan yosh oqizuvchi gaz va suv purkagichlardan foydalangan. Shuningdek, ijtimoiy tarmoqlarda ko‘chaga chiqishga chaqiruvchi “provokatsion postlar” joylashtirgani uchun 94 kishini qo‘lga olingan.
Imomo‘g‘li 2019-yilda Istanbul meri etib saylangan va 2024-yilda qayta saylangan. U korrupsiya, poraxo‘rlik va terrorchilar bilan hamkorlik qilishda gumonlanib hibsga olingan, siyosatchi barcha ayblovlarni rad etgan. Uning Respublika xalq partiyasi Imomo‘g‘lining hibsga olinishini siyosiy deb atadi.
Erdo‘g‘onning aytishicha, Turkiya rasmiylari jamoat tartibining buzilishiga yo‘l qo‘ymaydi. U namoyishlarni “ko‘cha terrorizmi” deb atadi va muxolifatni Istanbul merining hibsga olinishini siyosiylashtirishda aybladi.
Izoh (0)