Turk kinosini jahonga mashhur qilgan loyihalardan biri — “Sevgi iztirobi” serialining remeyki Rossiyada suratga olinadi. Hozirda internetda bosh rollarni Burak O‘zchivit, Neslihan Atagul va Kaan Urganjiog‘lu ijro etgan serial adaptatsiyasi haqidagi xabarlar qizg‘in muhokama qilinmoqda.
Rus OAV ma’lumotlariga ko‘ra, Norm Production studiyasi serialning remeykini suratga olishni o‘z zimmasiga olgan. Kompaniya o‘zining “Kalimba” va “Gusar” loyihalari bilan tanilgan. Bo‘lajak loyihaning birinchi mavsumi 85 qismdan iborat bo‘ladi va 2026-yildan keyin ekranlarda namoyish qilinadi.
Eslatib o‘tamiz, “Sevgi iztirobi” nufuzli Emmi mukofotiga sazovor bo‘lgan birinchi turk loyihasidir. Serial 2015—2017-yillar davomida suratga olingan. Undagi qiziqarli voqealar rivoji va ajoyib muhabbat hikoyasi butun dunyo tomoshabinlarining e’tiborini jalb qilgan.
Serial syujeti
Serial bosh qahramonlar — oddiy oila farzandi bo‘lgan Kamol va badavlat oilaning qizi Nihonning sevgi tarixiga asoslangan. Ular bir-birini yoqtirib qolishadi, biroq jamiyatdagi tabaqalanish, oilaviy bosimlar va fitnalar ularning baxtiga to‘sqinlik qiladi. Amir esa Nihonni o‘ziga turmushga chiqishga majbur qiladi. Shundan so‘ng Kamol va Nihon og‘ir sinovlarga duch keladi. Ularning sevgisi iztiroblar va kurashlarga to‘la bo‘ladi.
“Sevgi iztirobi” nafaqat Turkiyada, balki O‘zbekiston, Qozog‘iston, Rossiya, arab davlatlari va Lotin Amerikasi mamlakatlarida ham mashhurlikka erishgan.
Izoh (0)