Agar do‘stingiz sizdan turk kinematografiyasi bilan tanishish uchun qaysi serialdan boshlash kerakligini so‘rasa, ikkilanmay “Qizil sharbat”, “Qo‘rg‘on sirlari” kabi trendga aylangan loyihalarni aytishingiz mumkin. Ammo shunday seriallar borki, ular ko‘plab xorijiy mamlakatlarda e’tirof etilgan va o‘nlab chet tillariga tarjima qilingan. Quyidagi besh xil janrdagi seriallar har bir kino ixlosmandlariga turk dizi haqida ko‘proq ma’lumot olishiga yordam beradi.
Turkcha komediyalar
“Ijaraga olingan sevgi” (“Kirali Aşk”)
Tomoshabinni intrigalar, kutilmagan burilishlar va hayajonli muhabbat olamiga olib boradigan serial. Syujet markazida oilasi uni munosib qizga uylantirmoqchi bo‘lgan ishbilarmon tadbirkor Omar turibdi. Unga xotin sifatida Amerikadan qaytgan yosh qizni tanlashadi. Qiz nihoyatda go‘zal, o‘qimishli, lekin faqat yuqori jamiyatdagi kechalarga qiziqadi, eng muhimi, qiz Omarni mutlaqo qiziqtirmaydi. O‘ziga yuklangan bosimdan xalos bo‘lish uchun Omar hammaning ko‘z o‘ngida — kamtar, mehribon va chiroyli ofitsiant qiz Dafnani o‘padi. Bu xatti-harakati uning oilasi va ayniqsa, xolasining g‘azabiga sabab bo‘ladi, u Omarning hayotini noloyiq nomzod bilan bog‘lashiga yo‘l qo‘ymaslik uchun qo‘lidan kelgan hamma ishni qiladi.
“Ayni haqiqat” (“Aynen, aynen”)
Nil ismli qiz 30 yoshga yaqinlashib qoladi va atrofidagilari oila qurish va farzandli bo‘lish haqidagi savollari bilan doimo unga bosim o‘tkazadi. Shaxsiy hayotini qurishga qaror qilgan Nil o‘ziga munosib juft qidira boshlaydi. Bir qator muvaffaqiyatsiz uchrashuvlardan so‘ng, u nihoyat o‘ziga mos yigit — Emirni topadi. Emir ham kelishgan, ham zehnli va muvaffaqiyatli kishi bo‘lgani uchun Nilning barcha standartlariga javob beradi. Biroq bu “shahzoda” barqaror munosabatlarni istamaydi va Nildan shunchaki foydalanib yuradi. Denis ismli qiz Nilga yordamga keladi. Dugona orzusidagi insonni qanday qilib sevdirish va yonida olib qolish haqida o‘z maslahatlarini beradi.
Turkcha dramalar
“Fi. Chi. Pi.”
Turkiya uchun noodatiy hisoblangan “Fi Chi Pi” serialida tanish chehralar talaygina. Masalan, bosh rollarni Mehmet Gunsur hamda O‘zan Guven ijro etgan. Psixologik triller markazida iste’dodli psixiatr Jan Manay turadi. U muvaffaqiyatli karyera qurib, o‘z sohasining haqiqiy yulduziga aylangan. Muammo shundaki, uning ham qalbida qorong‘i tomonlari bor va bu tomonlar unga balerina Duru yoqib qolgan paytdan boshlab tobora aniq ko‘rina boshlaydi. U sevib qoladi, lekin bu tuyg‘u muhabbatdan ko‘ra ko‘proq qaramlikka o‘xshaydi. Axir Jan psixologik hiylalarni yaxshi biladi. So‘ng u Duru va qallig‘ining hayotini tun-u kun kuzatishni boshlaydi.
“Ota” (“Baba”)
Emin Saruxanli va uning oilasi Anadoludagi kichik bir shaharchada kamtarona hayot kechiradi. U oila boshlig‘i, qattiqqo‘l va qat’iyatli ota bo‘ladi. Bir kuni u bundan ko‘p yillar avval barcha aloqalarini uzgan ukasi fojiali tarzda vafot etganini bilib qoladi. Ukase Mehmet Saruxanli akasidan muvaffaqiyatliroq bo‘ladi va yirik tadbirkorlik faoliyatidan katta pul orttiradi. O‘limidan so‘ng uning boshqa oila a’zolari bo‘lmagani sababli barcha meros akasi Eminga o‘tadi. Emin buni istamasa-da, merosni majburan qabul qiladi. Shunday qilib, Saruxanlining katta oilasi Istanbulga boradi va u yerda barchaning hayoti keskin o‘zgarib ketadi.
Turkcha fantastika
“Atiye”
Atiye ismli yosh rassom Istanbulda yashaydi. U o‘zini baxtli his qilishi uchun hamma narsaga: sevimli ish, ijodiy ilhom uchun shaharning go‘zal manzarasi, O‘zan bilan ishonchli ishqiy munosabatlarga ega bo‘ladi. Kunlarning birida u qadimgi Go‘bekli Tepe majmuasida bir arxeolog qahramon bilan bog‘liq sirli artefaktni topadi. So‘ng u o‘tmish va bugungi kun haqidagi savollarga javob topishning qiyin yo‘liga kirishga majbur bo‘ladi. Bu yo‘l uning atrofidagi hamma narsa haqidagi fikrlarini butunlay o‘zgartirib yuboradi.
“Shohmoron” (“Şahmaran”)
Shaxsu — yosh psixologiya o‘qituvchisi bo‘lib, ona shahriga qaytishga majbur bo‘ladi. U ma’ruza o‘qish uchun Adana shahriga borganda ko‘p yillar avval onasi bilan aloqalarini uzgan bobosi bilan uchrashishga qaror qiladi. Bu sayohat davomida u Shohmaron xudosiga sig‘inadigan Mar nomli g‘ayrioddiy va sirli jamiyat borligi haqida xabar topadi. Dastlab bosh qahramonga bunday jonzot haqidagi barcha tarixiy afsonalar shunchaki ertakdek tuyulgan bo‘lsa, vaqt o‘tishi bilan uning mavjudligiga ishona boshlaydi. Mazkur fantastik serial tomoshabinlar e’tiborini darhol o‘ziga tortadi. Loyihada Mert Ramazan Demir, Serenay Sarikaya va Burak Deniz kabi aktyorlar bosh rollarni ijro etgan.
Turkcha tarixiy seriallar
“Ertug‘rul” (“Diriliş Ertuğrul”)
“Ertug‘rul” — prodyuser Mehmet Bozdag‘ tomonidan yaratilgan tarixiy sarguzasht teleserial. Undagi voqealar musulmon o‘g‘uz turklari tarixiga asoslangan bo‘lib, XIII asrga tegishli davr haqida hikoya qilinadi. Voqealar markazida Usmonlilar imperiyasining asoschisi Usmon I ning otasi Ertug‘rul Bey hayoti turadi. Tarixiy serialni suratga olish ishlari Turkiyaning Alanya, Beykoz va Nevshehir shaharlarida olib borilgan. Serial 2014-yil 10-dekabrda Turkiyaning TRT 1 telekanalida namoyish etilgan.
“Hukmdor Usmon” (“Kuruluş Osman”)
“Hukmdor Usmon” tarixiy jangovar turk seriali ham Mehmet Bozdag‘ tomonidan suratga olingan bo‘lib, “Ertug‘rul” ning davomiy qismi hisoblanadi. Serial syujeti Ertug‘rulning o‘g‘li Usmon G‘oziyning mustaqillik uchun Saljuqiylar saltanatiga qarshi qanday kurashgani haqida hikoya qiladi. Imperiya yaratish uchun Usmon ichki dushmanlarni mag‘lub etishi, so‘ngra kuchli Mo‘g‘ul va Vizantiya imperiyalari bilan to‘qnashuvga kirishishi kerak bo‘ladi.
Turkcha detektiv
“Shaxsiyat” (“Sehsiyet”)
Mazkur serial Alsgeymer kasalligiga chalingan qotil haqidagi hikoyadir. Nevra ismli ayol Istanbul politsiyasi qotillik bo‘limidagi yagona ayol ishchi bo‘lib, bir kun kelib uning yo‘li Agah bilan kesishadi. Agah 65 yoshli pensioner, avval sud-tibbiyot eksperti bo‘lib ishlagan. Biroq u tunda qotilga aylanadigan atipik manyak bo‘ladi. Afsonaviy turk aktyori Haluk Bilginer ushbu roli uchun Emmi mukofotiga sazovor bo‘lgan.
“Uch qurush” (“Üç Kuruş”)
Serial har biri o‘z yo‘lini tanlagan uch nafar eski do‘st haqida hikoya qiladi. Biri qurol oldi-sotdisi bilan shug‘ullanadi, ikkinchisi politsiyachi bo‘ladi va uchinchisi bir vaqtlar ozodlikdan mahrum qilingan bo‘ladi. Oradan yillar o‘tib uchala do‘stlarning yo‘li kesishadi. Serialda “Elchining qizi”dagi roli bilan mashhur bo‘lgan Uraz Kaygilarog‘lu, Ekin Koch, Ahmet Rifat Shungar kabi aktyorlar bosh qahramonlarni gavdalantirgan.
Izoh (0)