Turk kinosanoati muxlislariga yangi va qiziq sujetga ega seriallar haqida ma’lumot berib o‘tamiz.
“El qizi”
2021-yilning 23-oktabr kuni Turkiyaning Fox TV kanali orqali ekran yuzini ko‘rgan serialda Sevda Erginji, Ismail Ege Shashmaz bosh qahramon rolini ijro qiladi. Qahramon qiz onasidan erta ayriladi. Kunlardan bir kun onasining qotili kim ekani haqida xabar topadi. Kutilmaganda Ismail gavdalantirgan qahramon hayotiga kirib keladi va hayoti o‘zgarib ketadi.
“Mening hayotim”
“Mening hayotim” seriali 2021-yilning 31-oktabr kuni Star TV kanalida ekran yuzini ko‘rdi. Unda Nilsu Berfin Aktash, Genjo Ozak bosh qahramon sifatida namoyon bo‘lgan. Hayot ismli qiz dizayner bo‘lishni orzu qiladi. Ammo orzular hamisha ham hayotga to‘g‘ri kelavermaydi, olam-olam orzulari bor qizning badavlat xonadonda oqsoch bo‘lib ishlashiga to‘g‘ri keladi.
“Uch kurush”
2021-yilning 1-noyabrida Show TV kanali orqali efirga uzatilgan serialda tomoshabinlar “Elchining qizi”dagi roli bilan mashhur bo‘lgan Uraz Kaygilarog‘luni ko‘rishi mumkin. Shuningdek, Ekin Koch, Ahmet Rifat Shungar bosh qahramonni gavdalantirgan. Serial har biri o‘z yo‘lini tanlagan uch nafar eski do‘st haqida hikoya qiladi. Biri qurol oldi-sotdisi bilan shug‘ullanadigan, ikkinchisi politsiyachi bo‘lgan va uchinchisi, ozodlikdan mahrum qilingan do‘stlarning yo‘li oradan yillar o‘tib kesishadi.
“Senga vada beraman”
2021-yilning 2-noyabr kuni Star TV orqali ekran yuzini ko‘rgan serialda Erkan Petekkaya, Nexir Erdog‘on suratga tushgan. Muvaffaqiyatli politsiyachi Omer va jinoyatlar bilan bog‘liq voqealarni yoritadigan boshlovchi Elif, aybsizlarni himoya qilish uchun birlashadi va hamkorlik qiladi.
“Aziz”
Murat Yildirim, Damla Sonmez bosh qahramonni gavdalantiradigan serialining premyerasi 2021-yilning 5-noyabrida bo‘lib o‘tadi. Aziz Paydar ismli insonning hayoti fransuz millatiga mansub Pyer ismli shaxsning o‘z farzandi, leytenant Andreni o‘ldirganidan keyin o‘zgarib ketadi. U o‘zi tug‘ilib o‘sgan, o‘sha vaqtda fransuzlar okkupatsiyasida bo‘lgan Antakyani tark etishga majbur bo‘ladi. Oradan ikki yil o‘tganidan keyin u ortga qaytadi va uni allaqachon o‘lgan deb yurgan oila a’zolari shokka tushadi. Bu vaqtga kelib qaylig‘i Dilruba, uning yaqin do‘sti Adamga unashtirilgan bo‘ladi.
“Albatta, bir kun”
7-noyabr kuni ekranga uzatiladigan serialda Sinem Unsal, Shabnam Bozokli, Kenan Ajar va Burak Yamanturk suratga tushadi. Kunlardan bir kuni Kappadokiyadagi tashlandiq uylardan birida 15 yil avval o‘ldirilgan bir oilaga tegishli 5 ta murda topiladi. Qizig‘i shu oilaning boshqa ikki a’zosi tirik qolgan va har ikkisi o‘z yo‘lidan ketgan. Jurnalist Murat Guvenning “Yo‘qotilgan hayotlar” nomli ko‘rsatuvida ushbu hikoya bilan bo‘lishganidan keyin qizlarning hayoti o‘zgarib ketadi.
“Alparslon: Buyuk Saljuqiy”
Barish Arduch va Fahriya Evjen bosh qahramonni gavdalantirgan “Alparslon: Buyuk Saljuqiy” nomli serial, 8-noyabrda ekran yuzini ko‘radi. “Uyg‘onish: Buyuk Saljuqiy”ga prikvel bo‘lgan serialda Saljuqiylar davridan avvalroq yuz bergan voqea va hodisalar ko‘rsatiladi.
“Mehmon”
Fox TV orqali 2021-yilning 11-noyabrida ekranga uzatilishi rejalashtirilayotgan serialda Xazal Kaya, Burga Gulsay va Ozan Dolunay suratga tushgan. Hayoti davomida sevgi nimaligini bilmagan qizning hikoyasi oila qurish bilan boshlanadi. Ammo yolg‘on bilan boshlangan hikoya kutilmagan finalga sabab bo‘ladi.
“Yashirin”
23-noyabrda BluTV internet platformasida efirga uzatiladigan serialda Firat Chelik, Hazar Erguchli suratga tushadi. Amerikaning “The Affair” serialining remeyki bo‘lgan loyihada oilasi bo‘la turib bir-biriga oshiq bo‘lgan juftlik haqida hikoya qilinadi. Ularning o‘rtasidagi munosabatlar tomonlarning jiddiy psixologik muammolariga sabab bo‘ladi.
“Doston”
Kuz faslida premyerasi bo‘lib o‘tilishi kutilayotgan serialda “Beqaror”dagi roli bilan yaxshi ma’lum bo‘lgan Ebru Shahin, Edip Tepeli bilan birga suratga tushadi. Unda oddiy qiz va xonning farzandi o‘rtasidagi sevgi haqida hikoya qilinadi. Voqealar IX asr, O‘rta Osiyo hududida yuz beradi. Serial 14-15 mamlakat tomonidan allaqachon sotib olingan. “Doston” sotib olingan mamlakatlarda Turkiya bilan bir vaqtda translyatsiya qilinadi.
“Mavlono”
Premyerasi kuzning oxiri yoki qish faslining boshida bo‘lib o‘tishi kutilayotgan serialda Byulent Inal suratga tushadi. 30 qismdan iborat bo‘ladigan serialning davomiyligi 60 daqiqani tashkil qiladi. TRT1 kanalida efirga uzatiladigan loyihani muxlislar hafta davomida ikki marta tomosha qilishi mumkin.
Izoh (0)