Istanbul politsiyasi o‘tgan yakshanba kuni hibsga olingan shahar meri Akrom Imomo‘g‘lini qo‘llab-quvvatlash aksiyasini yoritgani uchun kamida sakkiz nafar turk jurnalistini hibsga oldi. Bu haqda Turkiya OAV xodimlari kasaba uyushmasi ma’lum qildi.
Disk-Basin-Is kasaba uyushmasi xabar qilishicha, kamida sakkiz nafar muxbir va fotosuratchini qamoqqa olishgan. Bu hukumatning norozilik kayfiyati kuchayishiga qarshi choralarini kuchaytirganidan darak beradi. Kasaba uyushmasi hokimiyat harakatlarini “matbuot erkinligi va xalqning haqiqatni bilish huquqiga tajovuz” deb baholagan.
Kasaba uyushmasi bayonotida qayd etilishicha, OAV vakillari tomonidan kasbiy faoliyatni amalga oshirish jinoyat hisoblanmaydi. Shu sababli tashkilot ushlanganlarni darhol ozod etishga chaqirgan.
“Kamida sakkiz nafar muxbir va fotomuxbir o‘z uyida hibsga olingan. Tashkilotning ishonchi komil: bu hokimiyatning mustaqil ovozlarni bo‘g‘ish va norozilik namoyishlarini yoritishni cheklashga urinishidir. Jurnalistlarni jim qilish bilan haqiqatni yashira olmaysiz!”, deya yozgan tashkilot o‘zining X ijtimoiy tarmog‘idagi sahifasida.
X ijtimoiy media platformasi Turkiya hokimiyatining 700 dan ortiq hisobni, shu jumladan yangilik tashkilotlari, jurnalistlar va Turkiya siyosiy arboblarining hisoblarini to‘sishga oid ko‘plab sud qarorlariga qarshi ekanligini bildirdi.
Avvalroq, Turkiya Ichki ishlar vazirligi rahbari Ali Yerlikaya o‘z navbatida, to‘rt kunlik norozilik namoyishlari davomida mamlakatda 1,1 mingdan ortiq kishi hibsga olinganini, ularda 123 nafar politsiyachi jarohatlanganini ma’lum qilgandi.
Izoh (0)