Suriyada 25-martga o‘tar kechasi internetga ulanish yo‘qoldi. Bu haqda NetBlocks xalqaro internet monitoringi xizmati xabar berdi.
Xizmatning ta’kidlashicha, bundan oldin Suriyaning bir nechta shaharlarida telekommunikatsiya tizimlarida nosozliklar yuzaga kelgan. Biroq aynan qaysi shaharlarda ekaniga aniqlik kiritilmagan. Avvalroq NetBlocks yanvar oyida Suriya bo‘ylab internet aloqalari soatlab o‘chirilganini ma’lum qilgan edi. O‘shanda mamlakat Aloqa vazirligi bunga “Asad rejimi qoldiqlari tomonidan amalga oshirilgan sabotaj” sabab bo‘lganini aytgandi. Suriya hukumati internetning so‘nggi o‘chirilishiga hozircha izoh bermadi.
Asad rejimi qulashi
Noyabr oyi oxirida qurolli isyonchilar, asosan HTSH jangchilari Suriya shimoliy qismiga yurishni boshladi. Ular Idlib viloyatini, mamlakatdagi aholi soni bo‘yicha ikkinchi o‘rinda turuvchi Xalab shahrini, Xama va Xoms viloyatlari hududlarining bir qismini o‘z nazoratiga oldi. Shundan so‘ng Damashqqa kirdi. Prezident Bashar Asad oilasi bilan mamlakatni tark etdi.
Rossiya Tashqi ishlar vazirligi Bashar Asad isyonchilar bilan kelishuvga erishib, iste’foga chiqishga rozi bo‘lgani, shundan keyin Suriyani tark etgani haqida ma’lumot berdi. Isyonchilar Asadni qo‘lga olishda yordam beradigan ma’lumot uchun 10 million dollar va’da qilgan.
Siyosatchi mamlakatni tark etganidan keyin isyonchilar Asad qarorgohiga bostirib kirgan, odamlar buyumlarni talon-toroj qilgan. Qarorgohdagi garajda BMW, Audi, Ferrari, Lamborghini Diablo kabi 50 ga yaqin hashamatli va qimmatbaho avtomobillar aniqlangan.
Kechroq Kremldagi manbalar Suriyadan qochgan prezident oilasi bilan Moskvaga kelgani, Putin ularga boshpana berganini ma’lum qildi. 10-dekabr kuni Idlib shahrida isyonchilarga rahbarlik qilgan Muhammad al-Bashir o‘zini Suriyaning o‘tish davri hukumati rahbari etib tayinlagandi. U fuqarolarga qarata qilgan televideniye murojaatida bu lavozimni kamida 2025-yil 1-martgacha egallab turishini aytgan. Endilikda al-Juloniy Suriya prezidenti deb e’lon qilindi.
Asad tarafdorlari va Suriya kuchlari o‘rtasidagi to‘qnashuvlar
Mart oyida Latakiya, Tartus, Xama va Xoms viloyatlarida Asad tarafdorlari bo‘lgan alaviylar va yangi Suriya hukumati o‘rtasida qurolli to‘qnashuvlar boshlandi. Qurbonlarning umumiy soni 1,3 ming kishidan oshdi, ulardan mingdan ortig‘i tinch aholi. Xavfsizlik kuchlarining reydlari 10-mart kuni yakunlandi. Suriya Mudofaa vazirligi vakili Hasan Abdul G‘ani hukumat xavfsizlik kuchlari “tashqaridan ag‘darilgan Bashar Asad rejimi qoldiqlarini zararsizlantirishga” va vaziyatni barqarorlashtirishga muvaffaq bo‘lganini aytdi.
Shundan so‘ng Suriyaning yangi hukumati Rossiya hukumatiga Asadni ekstraditsiya qilish talabi bilan murojaat qildi. Al Arabiya va Al Hadath nashrlari ma’lumotlariga ko‘ra, prezident Ahmad ash-Shara’a Asadni sud qilish uchun uni ushlab berishni talab qilmoqda. Shu bilan birga, Rossiya hozircha talabni qondirishdan bosh tortmoqda, chunki buni “ikki davlat o‘rtasidagi munosabatlarni tiklash uchun yengib bo‘lmas to‘siq emas” deb hisoblaydi.
Izoh (0)