Germaniya federativ respublikasi Tashqi ishlar vaziri Annalena Berbok payshanba kuni Germaniyaning Damashqdagi elchixonasini Suriyadagi qurolli mojaro boshlanganidan 13 yil o‘tgach qayta ochdi. Bu haqda Associated Press nashri xabar bermoqda.
“Elchixonani ochish bilan biz aniq aytamizki: Germaniya Damashqqa qaytdi. Germaniya uchun barqaror Suriya juda muhim”, dedi Berbok jurnalistlarga.
Aniqlik kiritilishicha, dastlab elchixona xodimlari soni kam bo‘ladi. Diplomatik vakolatxona ishini Livandagi elchixona xodimlari qo‘llab-quvvatlaydi. Elchixona ishini ishonchli vakil boshqaradi va hozircha konsullik va viza xizmatlarini ko‘rsatmaydi.
“Elchining qaytish istiqbollari bu yerdagi siyosiy vaziyatning rivojlanishiga va albatta, xavfsizlik holatiga bog‘liq bo‘ladi”, deya tushuntirdi Berbok.
Bundan tashqari, u mart oyida Suriya ma’muriyati va Suriya shimoli-sharqidagi kurdlar o‘rtasida tuzilgan kelishuvni olqishladi. Shuningdek, u mamlakat g‘arbida xavfsizlik kuchlari va Suriyaning sobiq prezidenti Bashar Asadga sodiq jangchilar o‘rtasidagi to‘qnashuvlarga aloqador shaxslarni javobgarlikka tortish zarurligini ta’kidladi.
Qo‘shimcha qilinishicha, Suriyani mojaro tufayli tark etgan millionlab qochqinlar darhol qaytib kelolmaydi. Uning so‘zlariga ko‘ra, ularning qaytishi Suriya bilan qo‘shni davlatlardan boshlab bosqichma-bosqich amalga oshirilishi kerak.
Bu Berbokning Damashqqa ikkinchi tashrifi. Keyinroq u o‘tish davridagi Suriya prezidenti Ahmad ash-Shara’a bilan uchrashishi kutilmoqda.
2024-yil noyabr oyi oxirida qurolli muxolifat guruhlari Suriya armiyasi pozitsiyalariga keng ko‘lamli hujum boshladi. 8-dekabr kuni ular Damashqqa kirishdi, Asad Suriya prezidenti lavozimini tark etdi va mamlakatdan chiqib ketdi.
Izoh (0)