Isroil Suriya va Livan chegarasida joylashgan “Hizbulloh” tunneliga zarba berdi. Mazkur tunneldan qurol kontrabandasi uchun foydalanilgani aytilmoqda. Bu haqda Isroil mudofaa armiyasi xabar berdi.
Isroil razvedkasining ta’kidlashicha, obyekt Bekka hududida qurol yetkazib berish uchun ishlatilgan va avval ham hujumlarga uchragan. Hujumda xavfsizlikka “to‘g‘ridan to‘g‘ri tahdid” solgan bir nechta o‘q-dorilar va raketa qurilmalari omborlari yo‘q qilingan.
Operatsiya Isroil va Livan o‘rtasidagi otashkesimga qaramay o‘tkazilgan. Isroil armiyasi tahdidlarni bartaraf etish va guruhning harbiy salohiyatini tiklashga yo‘l qo‘ymaslikka qaratilgan harakatlarni davom ettirishga tayyorligini aytgan.
Isroil va “Hizbulloh” kelishuvi
2024-yil 27-noyabrda Isroil va Livan o‘rtasida deyarli 14 oy uzluksiz davom etgan hujumlardan so‘ng Amerika tomonidan taklif etilgan kelishuv asosida o‘t ochishni to‘xtatish tartibi kuchga kirdi. Bitimni tasdiqlashdan oldin isroil bosh vaziri Binyamin Netanyaxu xalqqa murojaat qilib, shimoliy frontda o‘t ochishni to‘xtatish zarurligini tushuntirdi. U “Hizbulloh” tomonidan sulh buzilgan taqdirda Isroil javob qaytarib, harbiy harakatlarni qayta boshlashini ta’kidladi.
AQSH taklif etgan kelishuv rejasiga ko‘ra, 60 kun ichida Livan armiyasi mamlakat janubidagi hududlarni egallashi, “Hizbulloh” kuchlari va infratuzilmasi esa Isroil chegarasidan 20-30 kilometr masofada joylashgan Litani daryosining shimoliy qismiga o‘tkazilishi kerak.
Biroq mazkur sulhni yahudiy davlati birinchilardan bo‘lib buzdi
Yanvar oyida Isroil harbiylari Livan janubidagi o‘z kuchlarini olib chiqishi kerak bo‘lgan Aytarun aholi punktida uylarni yoqib yuborib, o‘t ochishni to‘xtatish qoidalarini buzdi. Isroil qo‘shinlari to‘liq olib chiqib ketilmaguncha va vaziyat barqarorlashmaguncha, fuqarolarga Aytarunga qaytish taqiqlangan.
Netanyaxu idorasi ta’kidlashicha, Isroil kuchlarini olib chiqish jarayoni Livan armiyasining mamlakat janubida joylashishi hamda “Hizbulloh” kuchlari va infratuzilmasini Litani daryosining shimoliga surib, kelishuvga to‘liq va samarali rioya etilishini ta’minlashi bilan bog‘liq.
Livan tomonidan o‘t ochishni to‘xtatish kelishuvi hali to‘liq bajarilmaganligi sababli, bosqichma-bosqich chiqish jarayoni Qo‘shma Shtatlar bilan to‘liq muvofiqlikda davom ettiriladi, deya aniqlik kiritdi bosh vazir idorasi.
Izoh (0)