Сурияда 25 мартга ўтар кечаси интернетга уланиш йўқолди. Бу ҳақда NetBlocks халқаро интернет мониторинги хизмати хабар берди.
Хизматнинг таъкидлашича, бундан олдин Суриянинг бир нечта шаҳарларида телекоммуникация тизимларида носозликлар юзага келган. Бироқ айнан қайси шаҳарларда эканига аниқлик киритилмаган. Аввалроқ NetBlocks январь ойида Сурия бўйлаб интернет алоқалари соатлаб ўчирилганини маълум қилган эди. Ўшанда мамлакат Алоқа вазирлиги бунга “Асад режими қолдиқлари томонидан амалга оширилган саботаж” сабаб бўлганини айтганди. Сурия ҳукумати интернетнинг сўнгги ўчирилишига ҳозирча изоҳ бермади.
Асад режими қулаши
Ноябрь ойи охирида қуролли исёнчилар, асосан ҲТШ жангчилари Сурия шимолий қисмига юришни бошлади. Улар Идлиб вилоятини, мамлакатдаги аҳоли сони бўйича иккинчи ўринда турувчи Халаб шаҳрини, Хама ва Хомс вилоятлари ҳудудларининг бир қисмини ўз назоратига олди. Шундан сўнг Дамашққа кирди. Президент Башар Асад оиласи билан мамлакатни тарк этди.
Россия Ташқи ишлар вазирлиги Башар Асад исёнчилар билан келишувга эришиб, истеъфога чиқишга рози бўлгани, шундан кейин Сурияни тарк этгани ҳақида маълумот берди. Исёнчилар Асадни қўлга олишда ёрдам берадиган маълумот учун 10 миллион доллар ваъда қилган.
Сиёсатчи мамлакатни тарк этганидан кейин исёнчилар Асад қароргоҳига бостириб кирган, одамлар буюмларни талон-торож қилган. Қароргоҳдаги гаражда BMW, Audi, Ferrari, Lamborghini Diablo каби 50 га яқин ҳашаматли ва қимматбаҳо автомобиллар аниқланган.
Кечроқ Кремлдаги манбалар Суриядан қочган президент оиласи билан Москвага келгани, Путин уларга бошпана берганини маълум қилди. 10 декабрь куни Идлиб шаҳрида исёнчиларга раҳбарлик қилган Муҳаммад ал-Башир ўзини Суриянинг ўтиш даври ҳукумати раҳбари этиб тайинлаганди. У фуқароларга қарата қилган телевидение мурожаатида бу лавозимни камида 2025 йил 1 мартгача эгаллаб туришини айтган. Эндиликда ал-Жулоний Сурия президенти деб эълон қилинди.
Асад тарафдорлари ва Сурия кучлари ўртасидаги тўқнашувлар
Март ойида Латакия, Тартус, Хама ва Хомс вилоятларида Асад тарафдорлари бўлган алавийлар ва янги Сурия ҳукумати ўртасида қуролли тўқнашувлар бошланди. Қурбонларнинг умумий сони 1,3 минг кишидан ошди, улардан мингдан ортиғи тинч аҳоли. Хавфсизлик кучларининг рейдлари 10 март куни якунланди. Сурия Мудофаа вазирлиги вакили Ҳасан Абдул Ғани ҳукумат хавфсизлик кучлари “ташқаридан ағдарилган Башар Асад режими қолдиқларини зарарсизлантиришга” ва вазиятни барқарорлаштиришга муваффақ бўлганини айтди.
Шундан сўнг Суриянинг янги ҳукумати Россия ҳукуматига Асадни экстрадиция қилиш талаби билан мурожаат қилди. Al Arabiya ва Ал Hadath нашрлари маълумотларига кўра, президент Аҳмад аш-Шараъа Асадни суд қилиш учун уни ушлаб беришни талаб қилмоқда. Шу билан бирга, Россия ҳозирча талабни қондиришдан бош тортмоқда, чунки буни “икки давлат ўртасидаги муносабатларни тиклаш учун енгиб бўлмас тўсиқ эмас” деб ҳисоблайди.
Изоҳ (0)