Suriyaning yangi hukumati Rossiya rahbari Vladimir Putindan sobiq prezident Bashar Asadni sud jarayoni uchun ekstraditsiya qilishni so‘radi. Bu haqda Al Arabiya xabar berdi.
Rasmiy so‘rov Suriya prezidenti va “Hay’at Tahrir ash-Shom” guruhi yetakchisi Ahmad ash-Shar’a (Al-Juloniy) nomidan Moskvaga yuborilgan. Bungacha Bashar Asad Moskvaga yuborgan mablag‘larni qaytarish so‘ralgan edi, deya xabar beradi Reuters manbalari.
Rossiya delegatsiyasining yaqinda Damashqdagi tashrifida Asadlar oilasining Rossiya aktivlariga hech qanday sarmoyasi yo‘qligi haqida ma’lumot berilgan.
Ushbu uchrashuv davomida Suriya vakillari Asadni mamlakatda sud qilish uchun Moskvaga topshirish masalasini yana ko‘targan, deb yozadi Al Arabiya.
Biroq uch soat davom etgan muzokaralardan so‘ng, Rossiya tomoni Asadni ekstraditsiya qilish masalasi “ikki davlat o‘rtasidagi munosabatlarni tiklash uchun yengib bo‘lmas to‘siq emasligi”ni ta’kidlagan.
20-mart kuni Putin suriyalik hamkasbiga hamkorlikni davom ettirish taklifi va uning “vaziyatni barqarorlashtirish bo‘yicha sa’y-harakatlarini” qo‘llab-quvvatlash so‘zlari bilan maktub yo‘lladi. Gap Suriyada hukumat qo‘shinlari va Asad tarafdorlari hisoblangan alaviylar o‘rtasida yuz bergan qurolli to‘qnashuvlar haqida ketmoqda. Mart oyi boshida Suriyaning shimoliy viloyatlarida bo‘lib o‘tgan ushbu janglarda mingdan ortiq tinch aholi halok bo‘ldi.
Fevral oyi boshida Suriyaning yangi mudofaa vaziri Murxaf Abu Kasra Rossiyaning Tartus va Xmeymimdagi harbiy bazalari masalasida mamlakat birinchi navbatda o‘z manfaatlaridan kelib chiqqan holda harakat qilishini ta’kidlagan. U Rossiya Suriyaga zarur bo‘lgan narsani, masalan, Moskvada yashiringan Asadni taklif qilsa, obyektlarni saqlab qolish imkoniyatiga ega bo‘lishini aytgan.
Putin so‘nggi oylarda Suriyadagi harbiy bazalari va Rossiya ta’sirini saqlab qolish umidida Asad hokimiyat tepasida bo‘lgan yangi Suriya hukumati tomon qadam tashlamoqda. Masalan, o‘tgan hafta mamlakatga Rossiya nefti ortilgan bir necha tanker kelgani ma’lum bo‘ldi. Bungacha, fevral va mart oylarida Damashqqa samolyotlarda Asad davrida Moskvada chop etilgan Suriya valyutasi olib kelingan. Ma’lumot o‘rnida, Bashar Asad oilasi bilan Moskvadan boshpana so‘ragan va u yerda istiqomat qilmoqda.
Izoh (0)