Suriyada sobiq prezident Bashar Asad tarafdorlari va xavfsizlik kuchlari o‘rtasida qonli to‘qnashuvlar bo‘lib o‘tdi. Qurbonlar soni ming kishidan oshdi. Amaldagi prezident Ahmad al-Shara’a (al-Juloniy) vaziyatga munosabat bildirdi. Bu haqda Reuters xabar berdi.
Buyuk Britaniyada joylashgan Suriya inson huquqlari observatoriyasining aytishicha, to‘qnashuvlar 13 yillik fuqarolik urushining eng shafqatsizi hisoblanadi. Muvaqqat prezident Ahmad Shara’a sobiq prezident Bashar Asad va uning tarafdorlarini murosaga chaqirib: “Biz milliy birlik va ichki tinchlikni saqlab qolgan holda birgalikda yashay olamiz”, dedi.
Suriya haqida xotirjam bo‘ling, bu mamlakat hali yashaydi. Hozir Suriyada sodir bo‘layotgan voqealar oldindan kutilgan edi, dedi Shara’a Damashqdagi masjidda so‘zlagan nutqida.
Bashar Asad hokimiyati 2024-yilning dekabr oyida ag‘darildi. Uning oilasi o‘nlab yillar davomida sulolaviy hukmronlik qilgan bo‘lib, bu davr qonli qatag‘onlar va halokatli fuqarolar urushi bilan ajralib turgan. Asad hokimiyatining ag‘darilishi sulolaviy boshqaruvga, shafqatsiz qatag‘onlarga va 2011-yilda tinch norozilik harakati sifatida boshlanib, halokatli fuqarolar urushiga aylanib ketgan voqealarga yakun yasadi.
G‘arb, Arab mamlakatlari va Turkiya Asadga qarshi kuchlarni qo‘llab-quvvatlagan. Rossiya hamda Eron esa Asadning hokimiyatda qolishini istagan. Bu urush yuz minglab odamlarning hayotiga zomin bo‘ldi va millionlab suriyaliklarni vatanidan ayirdi.
Asad ag‘darilgandan keyin Suriyada bir necha oylik nisbiy osoyishtalik hukm surdi. Mart oyidan boshlab esa Al-Juloniy Latakiya va Tartus shaharlarida Asadning alaviy mazhabi tomonidan kuchayib borayotgan isyonini bostirishga majbur bo‘ldi.
Ahmad Shara’a bilan uchrashgan Yevropa ittifoqi vakili Suriyadagi “tinch aholiga qarshi barcha zo‘ravonliklarni” va “barqaror va uzoq muddatli istiqbollarga putur yetkazishga bo‘lgan har qanday urinishlarni” qoraladi.
Izoh (0)