Tramp ma’muriyati sanksiyalarning bir qismi sifatida o‘nlab mamlakat fuqarolari uchun AQSHga viza olish cheklovlari joriy etishni ko‘rib chiqmoqda. Ro‘yxatda jami 41 ta davlat uchta alohida guruhga bo‘lingan holda ko‘rsatilgan. Bu haqda Reuters xabar berdi.
Birinchi guruhga kiruvchi 10 ta davlat, jumladan, Afg‘oniston, Eron, Suriya, Kuba va Shimoliy Koreya kabi mamlakatlar fuqarolari uchun vizalar berilishi to‘liq to‘xtatilishi mumkin.
Ikkinchi guruhga kiruvchi beshta mamlakat — Eritreya, Gaiti, Laos, Myanma va Janubiy Sudan — ba’zi istisnolarni hisobga olmaganda, sayyohlik va talaba vizalari, shuningdek, boshqa immigratsion vizalarga ta’sir qiladigan qisman cheklovlarga duch kelishi mumkin.
Uchinchi guruhda Belarus, Pokiston va Turkmaniston kabi jami 26 ta davlat mavjud bo‘lib, agar ularning hukumatlari “60 kun ichida kamchiliklarni bartaraf etish bo‘yicha choralar ko‘rmasa”, AQSH vizasini berishni qisman to‘xtatish masalasi ko‘rib chiqilishi mumkinligi ta’kidlangan.
Anonim AQSH rasmiysi ro‘yxatda o‘zgarishlar bo‘lishi mumkinligini va u hali ma’muriyat, jumladan, AQSH davlat kotibi Marko Rubio tomonidan tasdiqlanmaganligini ta’kidladi.
Ma’lumot o‘rnida, Tramp 2025-yilning 20-yanvarida milliy xavfsizlikka tahdidlarni aniqlash maqsadida AQSHga kirmoqchi bo‘lgan barcha chet elliklar uchun xavfsizlik tekshiruvini kuchaytirish to‘g‘risida farmon imzolagan. Ushbu farmonda 21-martgacha “tekshiruv va saralash ma’lumotlari yetarsiz bo‘lgan” davlat fuqarolari uchun viza berishni to‘xtatish masalasi joy olgan.
Izoh (0)