Ukraina prezidenti va uning jamoasi Amerikaning yuqori martabali diplomatlari bilan muzokaralar uchun Saudiya Arabistoniga keldi.
Zelenskiy 10-mart kuni iftorlikdan so‘ng Saudiya valiahd shahzodasi bilan qisqa uchrashuv o‘tkazdi. Mahalliy manbalarning yozishicha, Muhammad bin Salmon uning mamlakati Ukraina inqirozini hal qilish va tinchlikka erishishga qaratilgan barcha xalqaro sa’y-harakatlarni qo‘llab-quvvatlashini bildirgan.
Ayni vaqtda AQSH davlat kotibi ham Jidda shahrida bo‘lib turibdi. Biroq Sky News nashrining yozishicha, u Zelenskiy bilan uchrashmaydi. Buning o‘rniga Marko Rubio Saudiya valiahd shahzodasi bilan Yaman husiylarining savdo kemalariga tahdidi, Suriya va G‘azoni qayta qurish masalalarini muhokama qiladi.
Kiyev AQSH yordamini qayta tiklashga umid qilmoqda
Xabar qilinishicha, Ukraina delegatsiyasi amerikalik hamkasblarini Oq uydagi dahanaki jangdan so‘ng to‘xtab qolgan harbiy va razvedka yordamini tiklashga ko‘ndirmoqchi bo‘ladi.
Marko Rubio Jiddaga yo‘l olgach, jurnalistlarga intervyu berib, agar Ukraina va AQSH Tramp ma’muriyati uchun maqbul kelishuvga erishsa, Kiyevga nisbatan qo‘yilgan cheklovlar olib tashlanishini ma’lum qildi.
Biz ular tinchlik muzokaralariga kirishmoqchimi, shuni bilmoqchimiz. Bu urush Ukraina uchun juda qimmatga tushdi va qonli bo‘ldi, dedi Rubio.
Uning ta’kidlashicha, “Ukraina xalqi ulkan azob-uqubat chekkani bois Rossiya bilan murosa haqida gapirish juda qiyin. Ammo urushni tugatishning shundan boshqa yo‘li yo‘q”.
Men ularga hech qanday shart qo‘ymayman. Biz shunchaki ularning qanday pozitsiyada ekanini tinglamoqchimiz, keyin esa bu pozitsiyani Rossiyaning talablariga solishtirib, oradagi tafovutni aniqlaymiz, deya qo‘shimcha qilgan AQSH davlat kotibi.
Rubio, shuningdek, Ukraina Rossiya 2014-yildan beri egallab turgan hududlarning bir qismini berishi kerakligini, aks holda urushni tugatish bo‘yicha kelishuv imkonsiz bo‘lishini ta’kidladi.
Avvalroq Donald Tramp Zelenskiy manziliga tanqid yog‘dirib, uni AQSH yordamini “boladan konfetni tortib olgandek” qabul qilishda ayblagandi.
Izoh (0)