Rossiya Tashqi ishlar vazirligi Suriyadagi vaziyat, jumladan, prezident Bashar Asad mamlakatni tark etganiga munosabat bildirdi. Bu haqda Rossiya Tashqi ishlar vazirligi xabar berdi.
Ma’lum qilinishicha, Bashar Asad qurolli mojaro ishtirokchilari bilan muzokaralari natijasida prezidentlikdan ketishga qaror qilgan. U hokimiyatni tinch yo‘l bilan topshirish bo‘yicha ko‘rsatma bergandan so’ng mamlakatni tark etgan. Rossiya ushbu muzokaralarda ishtirok etmagan.
Rossiyaning Suriya hududidagi harbiy bazalari yuqori jangovar shaylik holatida. Ayni paytda ularning xavfsizligiga jiddiy tahdid yo‘q, deyiladi bayonotda.
Rossiya Suriya muxolifati guruhlarining barcha a’zolari bilan aloqada bo‘lib turibdi. Rossiya tomoni, shuningdek, Suriya jamiyatidagi barcha etnik va diniy guruhlarning fikrlarini hurmat qilishga chaqirdi.
Suriyada isyonchilar Damashqni egalladi
28-noyabr kuni Suriya muxolifatining qurolli guruhlari, jumladan, “Hayot Tahrir ash-Shom” jangchilari Halab viloyatining g‘arbiy hududlarida hukumat qo‘shinlariga yirik hujum boshladi. Ular Halab shahrini olgach, keyingi bir yarim hafta ichida Xoms, Xama shaharlarini ishg‘ol qildi va Suriya poytaxti Damashqqa yetib keldi.
Suriya prezidenti Bashar Asad oilasi bilan mamlakatni tark etgani haqida xabarlar tarqaldi. Syrian Air aviakompaniyasi samolyoti Damashq aeroportidan taxminan isyonchilar poytaxtni qo‘lga kiritgani haqida xabar tarqalgan paytda parvoz qilgan. Suriyaning xorijdagi asosiy muxolifat guruhi rahbari Hodi al-Bahro ham Damashq endi “Bashar Asadsiz” ekanini ta’kidlagan. Keyinroq Reuters nashri Asad bortida bo’lgan samolyot radarlardan yo’qolgani, ehtimol, urib tushirilgan bo’lishi mumkinligini ma’lum qildi.
Bosh vaziri hokimiyatni topshirishga tayyor
Suriya bosh vaziri Muhammad G‘ozi al-Jaloliy Suriya xalqi tomonidan tanlangan har qanday rahbariyat bilan hamkorlik qilishga va hokimiyatni “topshirish” uchun har qanday chora ko‘rishga tayyorligini ma’lum qilgan. U “Suriya davlatining barcha institutlari”ni saqlab qolishga chaqirib, davlat ishlarini boshqarishni davom ettirishga tayyorligini aytgan. Suriya bosh vaziri Muhammad G‘ozi al-Jaloliy o‘z uyidan chiqib, qurolli shaxslar hamrohligida muxolifat yetakchisi bilan uchrashish uchun ketdi.
AFP agentligi isyonchilar yetakchisiga tayanib, Damashqdagi davlat idoralari hokimiyat rasman o‘tkazilgunga qadar bosh vazir nazorati ostida qolishini ma’lum qildi.
Izoh (0)