Suriya muvaqqat prezidenti Ahmad al-Shara’a (al-Juloniy) Saudiya Arabistoniga tashrifi chog‘ida Umra ziyoratini ado etdi. Bu haqda Arab News xabar berdi.
Al-Juloniy 2-fevral kuni Ar-Riyodga yetib bordi va valiahd shahzoda Muhammad bin Salmon bilan uchrashdi. U Suriyaning xavfsizligi va barqarorligini qo‘llab-quvvatlash yo‘llarini muhokama qildi. Bu Al-Shara’aning lavozimga tayinlanganidan so‘ng amalga oshirgan birinchi xorijiy safari hisoblanadi. Al-Juloniy tashrif davomida Makkada Umra ziyoratini ado etdi.
Al-Shara’a 4-fevral kuni Turkiya rahbari Rajab Toyyib Erdo‘g‘onning taklifiga binoan Anqaraga tashrif buyuradi.
Suriyada hokimiyat almashinuvi va Saudiya Arabistonining roli
Al-Shara’a 29-yanvar kuni Suriya muvaqqat prezidenti etib tayinlandi. Uning rahbarligidagi “Hayot Tahrir ash-Sham” (XTSH) guruhi dekabr oyi boshida Suriya prezidenti Bashar Asadni ag‘darishga boshchilik qildi.
Saudiya Arabistoni podshohi Salmon va uning o‘g‘li shahzoda Muhammad bin Salmon Ash-Shara’ani Suriya prezidenti lavozimiga tayinlangani bilan tabriklagan birinchilardan bo‘ldi. Suriya urush vayron qilgan mamlakatni qayta tiklashni moliyalashtirish va iqtisodiyotni jonlantirish uchun Fors ko‘rfazining boy davlatlari yordamiga umid qiladi.
Yanvar oyi o‘rtalarida Saudiya Arabistoni Suriyaga qarshi sanksiyalarni bekor qilish tarafdori bo‘ldi. Dekabr oyida Asad taxtdan ag‘darilganidan beri Suriyaning yangi hukumati bir qator xorijiy siyosatchilarni, shu jumladan Germaniya tashqi ishlar vaziri Annalena Berbokni qabul qildi. U yanvar oyi boshida Suriyaga tashrif buyurgandi.
Izoh (0)