Suriya Mudofaa vazirligi vakili Hasan Abdul G‘ani “eski rejim qoldiqlariga qarshi amaliyot” yakunlanganini ma’lum qildi. Uning so‘zlariga ko‘ra, endilikda davlat muassasalari odatdagi faoliyatini tiklab, aholi uchun zarur xizmatlarni ko‘rsatishni boshlaydi. Bu haqda Al Arabiya xabar bermoqda.
Biz aholini normal hayotga qaytarish va xavfsizlikni mustahkamlash yo‘lida harakat qilyapmiz, dedi vazirlik vakili.
U, shuningdek, sobiq hukumat tarafdorlarining qolgan qismiga qarshi kurash davom ettirilishini va kelajakdagi har qanday tahdid bartaraf etilishini qo‘shimcha qildi.
Biroq jarayon tinch aholidan qurbonlarsiz o‘tmadi. Britaniyada joylashgan Suriya inson huquqlari kuzatuv markazi (Syrian observatory) bergan ma’lumotga ko‘ra, ikki kunlik janglarda 1 000 dan ortiq inson halok bo‘lgan. Ular orasida 745 nafar tinch aholi vakili, 125 nafar xavfsizlik xodimi va 148 nafar Asadga sodiq jangchilar bor.
Suriyaning yangi yetakchisi Ahmad ash-Shar’a 9-mart kuni qilgan chiqishida zo‘ravonliklarga aloqador shaxslarni javobgarlikka tortishga va’da berdi. U, shuningdek, to‘qnashuvlar va har ikki tomondan sodir etilgan qotilliklarni o‘rganish uchun mustaqil tergov qo‘mitasi tuzayotganini ma’lum qildi.
Abdul G‘anining qo‘shimcha qilishicha, xavfsizlik kuchlari tergov qo‘mitasi bilan hamkorlik qilib, barcha ma’lumotlarga to‘liq kirish imkonini beradi.
Biz sobiq rejim tarafdorlarining hujumlarini bostira oldik va ularning kutilmagan hujumlariga barham berdik. Muhim markazlarni qo‘riqlab, asosiy yo‘llarni nazoratga oldik, deya qo‘shimcha qildi u.
O‘zi nima bo‘ldi?
Bashar Asad o‘tgan yilning dekabr oyida hokimiyatdan ag‘darilgandan keyin mamlakatda nisbiy osoyishtalik hukm surayotgan edi. Ammo so‘nggi kunlarda uning sobiq tarafdorlari yangi hokimiyatga qarshi isyon boshlagach, mamlakatning asosan alaviylar yashovchi qirg‘oqbo‘yi hududlarida qurolli to‘qnashuvlar boshlandi. Sobiq prezident ayni shu diniy jamoaga mansub.
Xabarlarga ko‘ra, isyonni Bashar Asad davrida maxsus kuchlar sobiq qo‘mondoni bo‘lgan Suhayl al-Hasan bilan aloqador qurolli guruhlar boshlagan.
Izoh (0)