Suriyaning muvaqqat prezidenti Ahmad al-Shara’a Turkiya prezidenti Rajab Toyib Erdo‘g‘onga mamlakatda turk harbiy bazalarini joylashtirishni taklif qildi. Bu haqda manbalarga tayanib, Reuters xabar berdi.
Al-Shara’a va Erdo‘g‘on 4-fevral kuni bo‘lib o‘tgan uchrashuvda qo‘shma mudofaa paktini muhokama qilgan. Unga ko‘ra, Suriyaning markaziy qismida Turkiya aviabazalarini tashkil etish va yangi Suriya armiyasini tayyorlash ko‘zda tutilgan. Turkiya Suriya havo hududidan harbiy maqsadlarda foydalanishi mumkin.
Suriya xavfsizlik xizmati vakili anonimlik sharti bilan aytishicha, muhokama qilinayotgan bazalar Turkiyaga kelajakda har qanday hujumlar sodir bo‘lgan taqdirda Suriyani himoya qilish imkonini beradi. Aviabazalar Xoms viloyatidagi Palmira harbiy aeroporti va Suriya armiyasining T4 bazasida joylashtirilishi mumkin.
Erdo‘g‘onning aytishicha, u uchrashuvda Suriyadagi kurd qurolli guruhlariga qarshi birgalikda kurashish, Isroil armiyasini Golan tepaliklari hududidan olib chiqish masalalari muhokama qilingan. Muzokaralar yakunida siyosatchilar hech qanday kelishuvga erishmagan.
Turkiyaning allaqachon Suriya shimolida, davlat chegarasi yaqinida harbiy bazalari mavjud. Ular mamlakatni kurd tuzilmalaridan himoya qilishga mo‘ljallangan. Al-Shara’a va Erdo‘g‘on o‘rtasidagi muzokaralarni yoritgan muxbir ular yangi mudofaa shartnomasi haqida suhbatlashganini aytdi.
“Ular yangi harbiy bazalar haqida gaplashmoqda. Ularning joylashuvi hozircha noma’lum”, degan jurnalist.
Suriyadagi Rossiya bazalari taqdiri
3-fevral kuni Rossiya tashqi ishlar vaziri o‘rinbosari Mixail Bogdanov Rossiyaning Suriyadagi bazalarining kelgusi taqdiri masalasi qo‘shimcha muzokaralarni talab etishini aytgandi. Moskva Tartus portidagi harbiy-dengiz bazasini va Latakiya porti yaqinidagi aviabazasini saqlab qolmoqda. Ikkala baza ham O‘rta yer dengizi sohilida, Tiyas va Palmiradan 150 kilometrdan ortiq masofada joylashgan.
Ammo, OAV ma’lumotlariga ko‘ra Turkiyaga o‘tishi mumkin bo‘lgan harbiy bazalarda ham Rossiya harbiy kuchlari mavjud bo‘lgan. Rossiya harbiy aviatsiyasi Tiyasdan vaqtinchalik qo‘nish maydoni sifatida foydalangan. U yerda Eron tarafdori bo‘lgan kuchlar ham joylashgandi. 2016-yilda Associated Press agentligi Rossiya Qurolli kuchlari Palmiradagi aerodromni qayta jihozlashga urinayotgani haqida xabar tarqatgandi. Biroq u yerda to‘laqonli harbiy baza qad rostlamagan.
Izoh (0)