Suriya qurolli muxolifatining harbiy operatsiyalar departamenti prezident Bashar Asadni qo‘lga olishga yordam beradigan ma’lumot uchun 10 million dollar mukofot e’lon qildi. Bu haqda Alsaa, Yeni Safak va Ipekyol nashri xabar berdi.
Turkiyaning Milliyet nashri ham Asadning boshi uchun mukofot va’da qilinganini yozdi, biroq summasiga aniqlik kiritmadi. Suriya muxolifatining qurolli guruhlari, jumladan, “Hayot Tahrir ash-Shom” jangchilari 28-noyabr kuni Halab viloyatining g‘arbiy hududlarida hukumat qo‘shinlariga yirik hujum boshladi. Ular Halab shahrini olgach, keyingi bir yarim hafta ichida Xoms, Xama shaharlarini ishg‘ol qildi va Suriya poytaxti Damashqqa yetib keldi.
Prezident Bashar Asad oilasi bilan mamlakatni tark etgani haqida xabarlar tarqaldi. Keyinroq Reuters nashri Asad bortida bo‘lgan samolyot radarlardan yo‘qolgani, ehtimol, urib tushirilgan bo‘lishi mumkinligini ma’lum qildi.
Rossiya Tashqi ishlar vazirligi esa Bashar Asad isyonchilar bilan kelishuvga erishib, iste’foga chiqishga rozi bo‘lgani, shundan keyin Suriyani tark etgani haqida ma’lumot berdi.
O‘z navbatida, isyonchilar Suriya prezidentining qarovsiz qolgan saroyiga kirdi, odamlar buyumlarni talon-taroj qilishni boshladi. Qarorgohdagi garajda BMW, Audi, Ferrari, Lamborghini Diablo kabi 50 ga yaqin hashamatli va qimmatbaho avtomobillar aniqlandi. Hozirda Asad qarorgohida yong‘in chiqqani aytilmoqda.
Bosh vaziri hokimiyatni topshirishga tayyor
Suriya bosh vaziri Muhammad G‘ozi al-Jaloliy Suriya xalqi tomonidan tanlangan har qanday rahbariyat bilan hamkorlik qilishga va hokimiyatni “topshirish” uchun har qanday chora ko‘rishga tayyorligini ma’lum qilgan.
U “Suriya davlatining barcha institutlari”ni saqlab qolishga chaqirib, davlat ishlarini boshqarishni davom ettirishga tayyorligini aytgan. Suriya bosh vaziri Muhammad G‘ozi al-Jaloliy o‘z uyidan chiqib, qurolli shaxslar hamrohligida muxolifat yetakchisi bilan uchrashish uchun ketdi.
AFP agentligi isyonchilar yetakchisiga tayanib, Damashqdagi davlat idoralari hokimiyat rasman o‘tkazilgunga qadar bosh vazir nazorati ostida qolishini ma’lum qildi.
Izoh (0)