Suriyada isyonchilar Xoms shahrini bosib olganlaridan so‘ng mamlakat poytaxti Damashqqa bostirib kirganliklarini e’lon qildi. Suriya prezidenti Bashar Asad oilasi bilan mamlakatni tark etgani aytilmoqda. Bu haqda Reuters xabar berdi.
Isyonchilar Damashqqa kirishidan bir necha soat oldin Xoms shahrini bir kunlik janglardan so‘ng to‘liq nazoratiga oldi. Xomsning qo‘lga kiritilishi ularga Suriyaning strategik jihatdan muhim markazini va asosiy yo‘l chorrahasini nazorat qilish imkonini berdi.
“Suriya armiyasi qo‘mondonligi ofitserlarni prezident Bashar Asadning 24 yillik hukmronligi tugagani haqida xabardor qildi”, dedi suriyalik ofitser Reuters agentligiga.
Isyonchilar Damashq “endi Asaddan xalos bo‘lgani”ni ta’kidladi. Ikki nafar yuqori martabali armiya zobitiga ko‘ra, Bashar Asad Damashqdan noma’lum yo‘nalishda uchib ketgan.
Flightradar saytiga ko‘ra, Syrian Air aviakompaniyasi samolyoti Damashq aeroportidan taxminan isyonchilar poytaxtni qo‘lga kiritgani haqida xabar tarqalgan paytda parvoz qilgan. Suriyaning xorijdagi asosiy muxolifat guruhi rahbari Hodi al-Bahro ham Damashq endi “Bashar Asadsiz” ekanini ta’kidlagan.
Isyonchilar shahar qamoqxonasidan minglab mahbuslarni ozod qilgan. Xavfsizlik kuchlari uni shoshilinch tark etgan. Shahar atrofidagi tumanlarda Asadning otasi, marhum prezident Hofiz Asad haykali buzib tashlanib, parchalab yuborilgan. Shahar tashqarisida isyonchilar 24 soat ichida butun janubi-g‘arbni egallab, o‘z nazoratini o‘rnatdi.
Bosh vaziri hokimiyatni topshirishga tayyor
Al Arabiya telekanaliga ko’ra, Suriya bosh vaziri Muhammad G‘ozi al-Jaloliy Suriya xalqi tomonidan tanlangan har qanday rahbariyat bilan hamkorlik qilishga va hokimiyatni “topshirish” uchun har qanday chora ko‘rishga tayyorligini ma’lum qilgan.
U “Suriya davlatining barcha institutlari”ni saqlab qolishga chaqirib, davlat ishlarini boshqarishni davom ettirishga tayyorligini aytgan. Al-Jaloliy unga hech qanday lavozim va imtiyozlar kerak emasligini ta’kidlagan va o‘z uyida ekani, uni tark etish niyatida emasligini bildirgan.
AFP agentligi isyonchilar yetakchisiga tayanib, Damashqdagi davlat idoralari hokimiyat rasman o‘tkazilgunga qadar bosh vazir nazorati ostida qolishini ma’lum qildi.
Izoh (0)