Suriyani isyonchilar hujumidan keyin tark etgan prezident Bashar Asad oilasi bilan Moskvaga keldi. Bu haqda Kremldagi manbalarga tayanib, “TASS” xabar berdi.
Ma’lum qilinishicha, Bashar Asad Rossiyadan siyosiy boshpana so‘ragan.
Asad oila a’zolari bilan Moskvaga keldi. Rossiya gumanitar nuqtayi nazaridan ularga boshpana berdi, deydi “TASS” manbasi.
Rossiya samolyoti bir necha soat oldin Suriyaning Latakiya shahridan uchgan, keyin transponderni o‘chirib, Rossiya tomon yo‘nalgan. Bort Xmeymim harbiy bazasidan yoki Latakiya aeroportidan parvoz qilgan bo‘lishi mumkin. Ma’lumotni samolyotlar harakatini nazorat qiluvchi Flightradar saytida ko‘rish mumkin.
Samolyotning transponderi Moskva yaqinida qisqa muddatga yoqilgan va qo‘nishdan oldin yana o‘chirilgan. Transponder o‘chirilgani tufayli dastlab Suriya prezidenti bo‘lgan samolyot radarlardan g’oyib bo’lgani, ehtimol aviahalokatga uchragani haqida xabar tarqalgandi.
Suriyadagi vaziyat
Noyabr oyi oxirida qurolli isyonchilar Suriya shimoliy qismiga yurishni boshladi. Ular Idlib viloyatini, mamlakatdagi aholi soni bo‘yicha ikkinchi o‘rinda turuvchi Halab shahrini, Xama va Xoms viloyatlari hududlarining bir qismini o‘z nazoratiga oldi. Shundan so‘ng Damashqqa kirdi. Prezident Bashar Asad oilasi bilan mamlakatni tark etgani haqida xabarlar tarqaldi.
Keyinroq Reuters nashri Asad bortida bo’lgan samolyot radarlardan yo’qolgani, ehtimol, urib tushirilgan bo’lishi mumkinligini ma’lum qildi.
Rossiya Tashqi ishlar vazirligi esa Bashar Asad isyonchilar bilan kelishuvga erishib, iste’foga chiqishga rozi bo‘lgani, shundan keyin Suriyani tark etgani haqida ma’lumot berdi. Isyonchilar Asadni qo‘lga olishda yordam beradigan ma’lumot uchun 10 million dollar va’da qilingan.
Siyosatchi mamlakatni tark etganidan keyin isyonchilar Asad qarorgohiga bostirib kirgan, odamlar buyumlarni talon-taroj qilgan. Qarorgohdagi garajda BMW, Audi, Ferrari, Lamborghini Diablo kabi 50 ga yaqin hashamatli va qimmatbaho avtomobillar aniqlangan.
Izoh (0)