Litva Rossiya va Belarus bilan chegarada piyodalar hamda tanklarga qarshi minalar o‘rnatmoqchi. Avvalroq Polsha chegarasini tegishli tarzda himoya qilishi ma’lum bo‘lgandi.
Litva milliy mudofaa vaziri Dovil Shakalene Boltiqbo‘yi mamlakatlari va Polshadagi hamkasblari bilan “kontrmobillik konsepsiyasini yangilash va kengaytirish”ni muhokama qildi. Shakalen bu borada Polsha tajribasiga ishora qilgan.
Mintaqaviy hamkorlar ushbu maqsadga erishish uchun Yevropa Ittifoqidan moliyalashtirishga erishmoqchi, dedi Litva Mudofaa vazirligi.
Polsha mudofaa vaziri o‘rinbosari Pavel Beyda 18-mart kuni Rossiya va Belarus chegarasida piyodalarga qarshi minalar o‘rnatilishini aytdi. U gap million dona mina haqida ketayotgani, ularni mahalliy ishlab chiqarish rejalashtirilganini ta’kidladi.
Polsha mudofaa vaziri Vladislav Kosinyak-Kamish bu “Polshaning sharqiy chegarasi va NATOning sharqiy qanotini mustahkamlash bo‘yicha 1945-yildan beri amalga oshirilgan eng yirik loyiha” deb atagan.
Boltiqbo‘yi davlatlari va Polsha piyodalarga qarshi minalar bo‘yicha konvensiyadan chiqmoqchi
18-mart kuni Latviya, Litva, Estoniya va Polsha piyodalarga qarshi minalarni taqiqlash bo‘yicha Ottava konvensiyasidan chiqish niyatini e’lon qildi. To‘rt davlat mudofaa vazirlari bu qarorni Rossiyaning Ukrainaga bostirib kirishi ortidan NATOning Rossiya va Belarus bilan chegaradosh davlatlari uchun harbiy tahdid sezilarli darajada oshgani bilan izohladi.
Mamlakatlarimiz xavfsizligimizni himoya qilish uchun har qanday zarur choralarni ko‘rishga tayyor va qo‘llay oladi, deyiladi Boltiqbo‘yi davlatlari va Polsha harbiy idoralarining qo‘shma bayonotida.
Piyodalarga qarshi minalarni taqiqlash to‘g‘risidagi konvensiyani 1997-yilda 160 davlat imzolagan, Rossiya ular qatoriga kirmagan. Agar Latviya, Litva, Estoniya va Polsha konvensiyadan chiqsa, ular yana quruqlikdagi minalarni ishlab chiqarishi, joylashtirishi, saqlashi va yetkazib berishi mumkin bo‘ladi. Konvensiyadan chiqish ushbu mamlakatlarning milliy parlamentlari tomonidan ma’qullanishi kerak.
Dekabr oyida Finlyandiya ham Rossiyaning Ukrainada piyodalarga qarshi minalardan foydalanishi munosabati bilan konvensiyadan chiqish imkoniyatini ko‘rib chiqayotganini e’lon qilgandi.
Izoh (0)