Ukraina prezidenti Vladimir Zelenskiy AQSH prezidenti Donald Tramp bilan Oval ofisda yuz bergan bahs uchun uzr so‘ragan. Bu haqda Oq uyning Yaqin Sharq bo‘yicha maxsus vakili Stiv Vitkoff 10-mart kuni Fox News telekanaliga bergan intervyusida ma’lum qildi.
Vitkoffning ta’kidlashicha, bugun Saudiya Arabistonida bo‘lib o‘tayotgan AQSH—Ukraina muzokaralari har ikki davlat uchun Oq uydagi bahsdan so‘ng birinchi yuqori darajadagi uchrashuv bo‘ladi.
“Zelenskiy prezidentga maktub yo‘lladi va Oq uyda sodir bo‘lgan hodisa uchun uzr so‘radi. Bu muhim qadam edi,” dedi Stiv Vitkoff.
28-fevral kuni Oq uyda Zelenskiy va Tramp o‘rtasida keskin bahs yuzaga kelganidan so‘ng, Oq uy vakili Zelenskiydan rasman uzr so‘rashni talab qilgan edi. 4-mart kuni Zelenskiy voqeani “afsuslanarli” deb atagan va Trampning “kuchli yetakchiligi ostida” tinchlik yo‘lida ishlashga tayyorligini bildirgan edi.
Biroq Vitkoff ushbu bayonotni rasmiy uzr sifatida qabul qilganmi yoki Zelenskiy Trampga diplomatik kanallar orqali alohida maktub yo‘llaganmi, bu borada aniq ma’lumot yo‘q.
Vitkoff, shuningdek, Oq uyda yuz bergan bahsdan beri AQSH, Ukraina va Yevropa rasmiylari o‘rtasida doimiy muzokaralar olib borilayotganini aytdi. U Saudiya Arabistonidagi uchrashuv Ukraina mineral resurslari bo‘yicha to‘xtab qolgan kelishuvni jonlantirishi mumkinligiga umid bildirdi.
“Men buni progress deb atagan bo‘lardim... Umid qilamanki, kelishuv imzolanadi,” dedi Vitkoff.
Uning so‘zlariga ko‘ra, muzokaralarda Ukraina xavfsizligi bo‘yicha protokollar asosiy muhokama mavzularidan biri bo‘ladi.
“Bu murakkab masalalar emas, faqat ochiq-oydin muhokama qilinishi kerak,” deya qo‘shimcha qildi Vitkoff.
Oq uyda yuz bergan bahsdan so‘ng AQSh va Ukraina o‘rtasidagi munosabatlar keskin yomonlashdi. Vashington Kiyevga harbiy yordamni to‘xtatdi va muhim razvedka ma’lumotlarini ulashishni to‘xtatdi. Biroq Vitkoff intervyu davomida AQSH mudofaa maqsadlari uchun zarur bo‘lgan razvedka ma’lumotlarini uzatish to‘xtamaganini ta’kidladi.
Harbiy yordamning to‘xtatilishi Trampning o‘z partiyasidagi ayrim siyosatchilar tomonidan ham tanqid qilindi. Respublikachi senator Lindsi Grem Oq uyning qarori “Afg‘onistondagi vaziyatdan ham yomonroq oqibatlarga olib kishi mumkin” deb ogohlantirdi.
AQSh davlat kotibi Marko Rubio esa agar Saudiya Arabistonidagi muzokaralar muvaffaqiyatli o‘tsa, Vashington Kiyevga harbiy yordamni tiklashi mumkinligini ma’lum qildi. Biroq uning nutqida Ukraina Rossiya bilan sulh uchun ayrim hududlaridan kechishu mumkinligiga shama bor.
Izoh (0)