AQSH prezidenti Donald Tramp Rossiyani NATO va Yevropa uchun tahdid deb hisoblashdan bosh tortdi.
Fox News telekanali jurnalistlarining Ukraina prezidenti Vladimir Zelenskiyning “Rossiya shu yilning o‘zida NATO davlatlaridan biri – Polsha yoki Litvaga hujum qilishi mumkinligi” haqidagi so‘zlariga izoh berish iltimosiga quyidagicha javob berdi:
Men bunga qo‘shilmayman.
Trampning ta’kidlashicha, u bunga “mutlaqo” ishonmaydi.
Yo‘q, menimcha, Putin urushni to‘xtamoqchi. Agar u davom ettirmoqchi bo‘lsa, bu biz uchun katta muammo bo‘lardi. U ham, Zelenskiy ham mojaroga chek qo‘ymoqchi, deya o‘z javobini asosladi Tramp.
AQSH yetakchisining ta’kidlashicha, “Obama davrida Rossiya Ukrainaning ko‘plab hududlarini olishga muvaffaq bo‘ldi, endi esa Rossiya hammasini olishga harakat qilmoqda”.
Bu juda yomon. Bu haqiqatan ham juda yomon. Ko‘plab odamlar allaqachon vafot etgan, ko‘plab shaharlar, ming yillik ko‘rkam gumbazlar vayron bo‘lgan, dedi Tramp Ukrainadagi urushni yakunlash bo‘yicha rejalashtirilgan uchrashuv arafasida.
Zelenskiy: “Putin NATOga qarshi urush olib boradi”
Avvalroq Zelenskiy Rossiya joriy yildayoq Polsha yoki Litvaga hujumga tayyorgarlik ko‘rishi mumkinligini aytdi.
Biz Putin NATOga qarshi urush olib boradi, deb hisoblaymiz. Bu yozda – yozning boshida yoki oxirida bo‘lishi mumkin. U buni qachon tayyorlaydi, bilmayman. Ammo bu sodir bo‘ladi, dedi Ukraina prezidenti.
U Ukraina razvedkasi ma’lumotlariga tayanib bergan bayonotida Rossiya Belarusda 150 ming nafar harbiy ishtirok etadigan yangi harbiy mashg‘ulotlarga tayyorgarlik ko‘rayotganini aytdi. Zelenskiy Rossiyaning Ukrainaga keng ko‘lamli bostirib kirishi 2021-yildan beri davom etayotgan “bor-yo‘g‘i ramziy mashg‘ulotlar” bilan boshlanganini eslatdi.
Yevropa Ittifoqi kengashi raisi Antonio Koshta Financial Times gazetasiga bergan intervyusida Rossiya global miqyosda tahdid solayotganini aytdi.
Yangi xavfsizlik arxitekturasi bo‘yicha muzokaralar Rossiya nafaqat Ukraina uchun, balki global tahdid ekanini hisobga olishi kerak, deya ta’kidladi u. Siyosatchi Kreml Yevropa Ittifoqi va NATOga a’zo bo‘lgan Boltiqbo‘yi davlatlari, xususan, Estoniya, Latviya va Litvaga nisbatan “tajovuzkor pozitsiya”da ekanini qayd etdi.
AQSH va Rossiya o‘rtasida Ukrainadagi urushni tugatish bo‘yicha muzokaralar Saudiya Arabistonida bo‘lib o‘tadi
18-fevral kuni Saudiya Arabistoni poytaxtida AQSH va Rossiya vakillarining Ukrainadagi urushni tugatish bo‘yicha muzokaralari bo‘lib o‘tadi. AQSH delegatsiyasi tarkibiga davlat kotibi Marko Rubio, Oq uyning milliy xavfsizlik bo‘yicha maslahatchisi Mayk Uolts va Trampning Yaqin Sharq bo‘yicha maxsus vakili Stiv Uitkoff kiradi.
Kremlning ta’kidlashicha, Rossiya TIV rahbari Sergey Lavrov va Rossiya prezidenti yordamchisi Yuriy Ushakov AQSH delegatsiyasi bilan muzokaralar o‘tkazish uchun Ar-Riyodga uchib ketmoqda.
Uchrashuvda e’tibor birinchi navbatda “Rossiya-AQSH munosabatlarining butun majmuasini tiklash”, shuningdek, “Ukrainadagi vaziyatni tartibga solish bo‘yicha ehtimoliy muzokaralarni tayyorlash” va Putin va Trampning uchrashuvini tashkil etishga qaratiladi, dedi Kreml matbuot kotibi Dmitriy Peskov.
NBC: AQSHning Rossiya va Ukraina bilan alohida, keyin esa qo‘shma muzokaralari
NBC telekanali AQSH delegatsiyasi Rossiya va Ukraina bilan dastlab alohida, keyin esa birgalikda muzokaralar o‘tkazishini ma’lum qildi.
Aynan shuning uchun Ukraina AQSH va Rossiya vakillarining Saudiya Arabistonidagi muzokaralariga taklif qilinmadi, dedi telekanalga ikki amerikalik amaldor.
Izoh (0)