AQSH prezidenti Donald Tramp Kiyevga barcha harbiy yordamni to‘xtatishni buyurdi. Bu haqda Bloomberg xabar berdi.
Ma’lum qilinishicha, AQSH Ukrainaga barcha joriy harbiy yordamni uning rahbariyati tinchlikka sodiqligini namoyish etmaguncha to‘xtatadi. Pentagonning yuqori martabali vakili mazkur ma’lumotni tasdiqlagan. Oq uydagi janjaldan so‘ng Tramp agar ukrainalik hamkasbi Vladimir Zelenskiy tinchlik istayotganini tasdiqlasa, Kiyev Vashington bilan muzokaralarga qaytishi mumkinligini aytdi.
Gap hozirda Ukrainada bo‘lmagan Amerika harbiy texnikasini, jumladan, Polsha orqali o‘tayotgan qurollarni yetkazib berishni to‘xtatish haqida ketmoqda. Tramp mudofaa vaziri Pit Xegsetga tegishli buyruq bergan.
Bu yordamning uzil-kesil to‘xtatilishi emas, bu pauza, deya aniqlik kiritdi Fox News telekanaliga prezident ma’muriyati vakili.
The Wall Street Journal 3-mart kuni Amerikaning amaldagi va sobiq amaldorlariga tayanib, Tramp ma’muriyati Ukrainaga yangi qurol-yarog‘ yetkazib berishni moliyalashtirishni to‘xtatgani haqida yozgan edi. Gazeta ma’lumotlariga ko‘ra, shu kuni Oq uy yig‘ilish o‘tkazadi, unda Amerika arsenallaridan barcha qurol-yarog‘larni muzlatish masalasi muhokama qilinadi.
♦ Prezidentlar o‘rtasidagi janjal 28-fevral kuni sodir bo‘ldi. Zelenskiy Rossiya prezidenti Vladimir Putin bilan diplomatik munosabatlar o‘rnatishga qarshi chiqib, o‘z pozitsiyasini Moskva ilgari erishilgan kelishuvlarni bir necha bor buzgani bilan asosladi.
Bunga javoban Tramp va AQSH vitse-prezidenti Vens Zelenskiyni tanqid qilib, uni urushni davom ettirish istagi va Amerika tomoniga hurmatsizlikda aybladi. Oxir-oqibat, uchrashuv bahsga aylanib ketdi va Zelenskiy foydali qazilmalar bo‘yicha bitimni imzolamasdan Oq uyni muddatidan oldin tark etdi.
Voqeadan so‘ng Tramp ma’muriyati Ukrainaga harbiy yordamni to‘xtatishini e’lon qildi. Oq uy rasmiy vakili Kerolayn Levittning ta’kidlashicha, AQSH tinchlik muzokaralarini ustuvor vazifa deb biladi va endi “juda uzoq mamlakatdagi urush uchun chek yozish” niyatida emas.
AQSH 2022-yil 24-fevraldan beri Ukrainaga 65,9 milliard dollarlik harbiy yordam ko‘rsatdi.Vashington Kiyevga qancha miqdorda qurol yuborganini ma’lum qilmadi.
AQSHning avvalgi prezidenti Jo Bayden ma’muriyati “Ukrainaga xavfsizlik sohasida yordam ko‘rsatish tashabbusi” deb nomlangan dastur doirasida Kiyevga 33,2 milliard dollar ajratdi, deb yozdi The New York Times. Taqdim etilgan mablag‘lardan Kiyev faqat to‘g‘ridan-to‘g‘ri Amerika mudofaa kompaniyalaridan yangi harbiy texnika sotib olish uchun foydalanishi mumkin. Bayden davrida AQSH navbatdagi transhlar haqida taxminan 44 kunda bir marta e’lon qilgan, Tramp ma’muriyati esa hech qanday e’lon qilmagan: masalan, NYT ta’kidlaganidek, dastur bo‘yicha so‘nggi mablag‘ ajratilishi 2024-yil 30-dekabrda e’lon qilingan. Trampning inauguratsiyasi 2025-yil 20-yanvarda bo‘lib o‘tgan edi.
Izoh (0)