Britaniyaning The Economist jurnali Ipsos agentligi o‘tkazgan so‘rov natijalarini e’lon qildi. Unga ko‘ra, Ukrainada Vladimir Zelenskiyning reytingi Oq uyda Donald Tramp bilan uchrashuvidan so‘ng keskin ko‘tarilgan.
The Economist buyurtmasi bilan Ipsos agentligi tomonidan telefon orqali o‘tkazilgan so‘rovnomada 1000 nafar ukrainalik ishtirok etgan. Ularning mutlaq ko‘pchiligi (74 foizi) AQSH yordamisiz ham harbiy harakatlarni davom ettirishni yoqlab chiqmoqda.
Shuningdek, respondentlarning 59 foizi (21 foizi qarshi) Ukraina hali ham jang maydonida g‘alaba qozonishi mumkin, deb hisoblaydi. Bu fikr AQSH rasmiylarining, xususan, davlat kotibi Marko Rubioning buning imkonsizligi haqidagi bayonotlariga zid.
Maqola mualliflarining yozishicha, hozirda Zelenskiy aholi e’tibori bo‘yicha bo‘lajak prezidentlar orasida peshqadamlik qilmoqda. Agar hozir saylov o‘tkazilsa, sobiq qo‘mondon Valeriy Zalujniy katta farq bilan mag‘lub bo‘lishi mumkin.
Yana bir sotsiologik so‘rovnomadan ma’lum bo‘lishicha, Zelenskiyni eng ko‘p ayollar, yoshlar va Ukrainaning eng sharqiy hududlari aholisi qo‘llab-quvvatlamoqda.
Zalujniy esa odatda jangovar kayfiyatdagi va murosaga kelishni istamayotgan katta yoshli saylovchilar orasida ko‘proq obro‘ga ega bo‘lmoqda.
Bunda 10 nafar ukrainalikning 7 nafari Zelenskiyning faoliyatini ma’qullashini aytmoqda. 10 kishidan 8 nafari esa uni hamon Ukrainaning qonuniy prezidenti deb bilishini va harbiy harakatlar davom etayotgan paytda saylov o‘tkazish g‘oyasini rad etishini ta’kidlagan.
Agar ushbu so‘rovnoma natijalariga ishonilsa, ukrainaliklarning aksariyati Zelenskiy uchun jon berishga tayyor. Ular harbiy komissarlarni ko‘rganda qochib ketish o‘rniga frontga jo‘nash uchun navbatda turishibdi.
Izoh (0)