AQSH prezidenti Donald Tramp va Rossiya rahbari Vladimir Putin 20-aprelga to‘g‘ri keladigan Pasxa bayrami yoki 9-mayga qadar Ukrainadagi urushni to‘xtatish bo‘yicha kelishuvga erishishi mumkin. Bu haqda Ukraina va G‘arbning yuqori martabali amaldorlariga tayanib, Financial Times xabar berdi.
“Putin shunday muhim kunlardan birida kelishuvga erishishni xohlaydi”, deydi ukrainalik amaldor.
Putinga yaqin manbalarga ko‘ra, prezidentning asosiy maqsadi Rossiyaga Yevropadagi ta’sir doirasiga o‘xshash mavqeni ta’minlaydigan yangi xavfsizlik tizimini yaratishdir. Bu xuddi Ikkinchi jahon urushi oxirida Yalta konferensiyasi Sovet ittifoqiga bergan imkoniyatlarga o‘xshash bo‘lishi kutilmoqda.
Hozirgi vaziyat Putin uchun uch yillik urushning boshqa har qanday davridagidan ham qulay ko‘rinmoqda, deb ta’kidlaydi Berlindagi Karnegi Yevroosiyo markazi direktori Aleksandr Gabuyev.
U AQSH Ukrainani harbiy va diplomatik jihatdan qo‘llab-quvvatlashni, razvedka ma’lumotlari almashishni to‘xtatsa, Kiyev juda og‘ir ahvolga tushishi ta’kidladi.
Bu Yevropa davlatlari yanada ko‘proq aralashsa ham, inqirozdan chiqishni kafolatlamaydi, dedi u.
Ta’kidlanishicha, Trampning 12-fevral kuni rossiyalik hamkasbiga telefon qo‘ng‘irog‘i Moskvada sezilarli kayfiyat uyg‘otgan.
Birgina qo‘ng‘iroq tarix yo‘nalishini o‘zgartirishi mumkin — bugun AQSH va Rossiya rahbarlari, ehtimol, qarama-qarshilik emas, balki hamkorlikka asoslangan kelajak eshigini ochdi, deydi mahbuslarni almashish bo‘yicha AQSH bilan maxfiy muzokaralar olib borgan Rossiya suveren boylik jamg‘armasi rahbari Kirill Dmitriyev.
Bu qo‘ng‘iroq Jo Bayden davridagi AQSH siyosatidan keskin burilish bo‘ldi. Bayden Rossiyani izolyatsiya qilish uchun boshqa G‘arb mamlakatlari bilan hamkorlik qilayotgan bir paytda, Ukrainani “kerak bo‘lguncha” qo‘llab-quvvatlashga va’da bergandi. Endi esa Tramp Ukraina shartlari asosidagi g‘alaba “realistik emas” deb baholamoqda.
Nihoyat, amerikaliklar urush boshlanganidan beri ukrainaliklarga singdirib kelgan behuda xomxayollarsiz jiddiy munosabatda bo‘lmoqda. Bu sog‘lom fikr va urushni to‘xtatish imkoniyatidir, dedi Rossiyaning sobiq yuqori lavozimli amaldori.
Putin uch kun o‘tganidan so‘ng, Rossiyaning g‘alaba rejalari amalga oshmayotganini anglab yetganida, o‘zining barcha xayollaridan voz kechgandi. Lekin yevropaliklar va amerikaliklar shundan beri xomxayollar ta’sirida bo‘lib keldi va endi anglay boshlashdi”, deydi sobiq amaldor.
AQSH prezidenti Putin va Zelenskiy bilan telefonda suhbatlashdi
Tramp 12-fevral kuni dastlab rossiyalik hamkasbi Vladimir Putinga qo‘ng‘iroq qilgan. Tomonlar Ukrainadagi urush, Yaqin Sharq, energetika, sun’iy intellekt va dollar ta’siri haqida gaplashgan. Rossiya prezidenti Trampni Moskvaga taklif qilgan va Ukraina masalasini hal qilish uchun Amerika rasmiylarini qabul qilishga tayyorligini aytgan. Tramp esa ular o‘rtasidagi uchrashuv Saudiya Arabistonida bo‘lishini aytmoqda.
Ukraina rahbari esa amerikalik hamkasbi bilan suhbat tafsilotlarini quyidagicha izohlagan:
Tinchlikka erishish imkoniyatlari haqida uzoq gaplashdik. Hech kim Ukrainadan ko‘ra ko‘proq tinchlikni xohlamaydi. AQSH bilan birgalikda Rossiya agressiyasini to‘xtatish va barqaror tinchlikni ta’minlash ustida keyingi qadamlarimiz xaritasini belgilamoqdamiz, bo‘lajak uchrashuvlarni rejalashtirdik, dedi Zelenskiy.
Ukraina prezidentiga ko‘ra, suhbatda Tramp Putin bilan nimalarni muhokama qilganini ham aytgan. Biroq bunga aniqlik kiritmagan.
Izoh (0)