Mutaxassislar Qozog‘istondan Rossiyaga yetkazib berilayotgan tovuqda listeriya bakteriyasini aniqladilar. Bu bakteriya organizmga tushganda o‘limga olib kelishi mumkin. Bu haqda Rosselxoznadzor xabar qildi.
Jurnalistlarning ma’lumotlariga ko‘ra, Rossiya hududiga go‘shtni “Makinskaya ptitsefabrika” yetkazib beradi. Ushbu korxona qo‘shni respublikadagi eng yirik tovuq ishlab chiqaruvchisi bo‘lib, O‘zbekiston va Qirg‘izistonni ham mahsulot bilan ta’minlaydi.
Xabarda aytilishicha, Rosselxoznadzor xodimlari Oltoy o‘lkasining Barnaul shahrida go‘sht partiyasidan namuna olishgan. Tovuq laboratoriya tekshiruviga yuborilgan va mutaxassislar unda listeriya mavjudligini aniqlashgan.
Go‘sht musodara qilindi, Qozog‘istondan keltirilgan mahsulotlar esa kuchaytirilgan nazoratga olindi, deyiladi xabarda.
Bundan tashqari, Rosselxoznadzor boshqa ishlab chiqaruvchilarning mahsulotlari ustidan ham nazoratni kuchaytirdi. Kompaniyalardan ular yetkazib berayotgan tovuqning iste’molchilar uchun xavfsiz ekanligini tasdiqlash talab qilindi.
Listeriya — xavfli yuqumli kasallik listeriozni keltirib chiqaruvchi bakteriya. Bu kasallik odamning markaziy asab tizimi va reproduktiv organlarini zararlaydi, oxir-oqibat o‘limga olib kelishi mumkin.
Birinchi navbatda xavf guruhiga homilador ayollar, keksalar, chaqaloqlar va immunitet tizimi zaif bo‘lgan odamlar kiradi. Listeriozning yashirin davri 90 kungacha cho‘zilishi mumkin.
Izoh (0)