Rossiya prezidenti Vladimir Putin Ozarbayjon samolyoti qulashi munosabati bilan hamkasbi Ilhom Aliyevdan uzr so‘ragan. Bu haqda Putinning matbuot kotibi Dmitriy Peskov xabar berdi.

Ma’lum qilinishicha, Putin va Ilhom Aliyev ikki marta telefon orqali muloqot qilgan. Ozarbayjon prezidenti aviahalokatga Rossiya vakillari sababchi ekanini ta’kidlagan. 

“Putin Azerbaijan Airlines layneri halokati uchun uzr so‘radi va chuqur ta’ziya bildirdi, tergov organlariga zarur ko‘rsatmalar berildi hamda aviahalokatni tekshirishda ko‘maklashilmoqda”, dedi Peskov.

U Ilhom Aliyevning Rossiya “voqeani bosdi-bosdi” qilishga uringani haqidagi aybloviga ham munosabat bildirdi.

“Biz bu falokatning sabablarini aniqlash uchun mutlaqo xolis va beg‘araz tekshiruv o‘tkazilishidan manfaatdormiz”, dedi Peskov.

♦ Oqtovdagi aviahalokat

Bokudan Grozniyga J28243 reysini amalga oshirayotgan Embraer 190 samolyoti 25-dekabr kuni ertalab Qozog‘istonning Oqtov shahri yaqinida halokatga uchradi. Dispetcherlar Grozniy va Maxachqal’ada qo‘nishni rad etganidan keyin layner majburiy qo‘nishni amalga oshirishga urindi. Oqtov aeroportiga bir necha kilometr qolganda u qulab tushdi, portlab, yonib ketdi.

Burun qismi to‘liq yongan, dum qismida esa omon qolganlar bo‘lgan. Kamida 29 nafar tirik qolgan yo‘lovchi aynan shu qismda bo‘lgan. Azerbaijan Airlines samolyoti qulashi oqibatida 38 kishi halok bo‘lgan. Qulagan samolyot ko‘zdan kechirilganda teshiklar aniqlangan. Shunga asoslanib, samolyotni Chechenistonga dron hujumini qaytargan havo hujumidan mudofaa tizimi o‘qqa tutgan bo‘lishi mumkin.

♦ Ozarbayjon prezidenti aviahalokat sabablari haqida

Ilhom Aliyev yakuniy versiya qora qutilar ochilgandan so‘ng ma’lum bo‘lishini aytgandi. Ammo dastlabki taxminlar ham yetarli darajada va faktlarga asoslanganini bildirgan.

“Faktlar shundan iboratki, Ozarbayjon fuqarolik samolyoti Rossiya hududida, Grozniy shahri yaqinida tashqi ta’sir oqibatida shikastlangan va deyarli boshqaruvni yo‘qotgan. Shuningdek, bizning samolyotimiz radioelektron kurash vositalari yordamida boshqarib bo‘lmaydigan holatga tushirilganini ham bilamiz. Bu samolyotga yetkazilgan birinchi zarar hisoblanadi”, degan u Ozarbayjon televideniyesiga bergan intervyusida.

Shundan so‘ng Aliyev yangi bayonot berib, ayb Rossiya vakillarida ekanini ta’kidladi.

“Men ishonch bilan ayta olamanki, halokatda, Ozarbayjon fuqarolari o‘limida ayb Rossiya Federatsiyasi vakillarida. Yaqin kunlarda biz dastlabki natijani bilamiz va hamma narsa o‘z o‘rniga tushadi, yuz bergan fojianing to‘liq manzarasi oydinlashadi. Bu, albatta, ushbu fojiani to‘liq tergov qilish va aybdorlarni jazolash ishida muhim ahamiyat kasb etadi”, degan Ozarbayjon prezidenti.

♦ Rossiyaga qo‘yilgan talablar

“Biz Rossiya tomoniga o‘z talablarimizni aniq bayon qildik. 27-dekabr kuni bu talablar ularga rasman topshirildi. Ular nimadan iborat? Birinchidan, Rossiya tomoni Ozarbayjondan uzr so‘rashi kerak. Ikkinchidan, ular o‘z ayblarini tan olishi lozim.

Uchinchidan, ular aybdorlarni jazolashi, jinoiy javobgarlikka tortishi va Ozarbayjonga, jabrlangan yo‘lovchilar va ekipaj a’zolariga tovon to‘lashi kerak — bu bizning shartlarimiz. Ulardan birinchisi kecha taqdim etilgandi. Umid qilamanki, boshqa shartlarimiz ham qabul qilinadi”, degan esa Ilhom Aliyev.

So‘nggi ma’lumotlarga ko‘ra, Braziliya Oqtovda qulab tushgan Ozarbayjonning Embraer 190 samolyotining qora qutilarini rasshifrovka qilishni yakunlagan. Materialni braziliyalik uch nafar tergovchi, shuningdek, Ozarbayjon va Rossiya mutaxassislari tahlil qilgan.

Barcha ma’lumotlar aviahalokatni tahlil qilish va tekshirish uchun mas’ul bo‘lgan Qozog‘istonga yuborilgan. Ular aviatsiya halokati bo‘yicha yakuniy hisobotda e’lon qilinishi kutilmoqda. Tekshiruv va uning yakuniy natijalarini e’lon qilish uchun Qozog‘iston javobgardir.