Qozog‘istondan yer ostidan o‘tkazilgan quvur orqali benzin tashiganlar ushlandi, deb xabar bermoqda O‘zA.
Maʼlum qilinishicha, Toshkent viloyatining Qibray tumanida yashovchi 1986-y.t. M.M. va 1997-y.t. X.X. Qozog‘iston fuqarosi A.K. bilan o‘zaro til biriktirgan. Ular qo‘shni davlatdan O‘zbekiston hududiga noqonuniy yo‘llar bilan Ai-92 markali benzin yonilg‘isini o‘tkazish va sotish bilan shug‘ullangan.
Ular ushbu noqonuniy ishni Qozog‘istonning Turkiston viloyati Sariog‘och tumani hududidan Toshkent viloyatining Qibray tumani hududiga yer ostidan o‘tkazilgan taxminan 300 metr uzunlikdagi quvur ichiga shlang joylashtirish orqali amalga oshirishgan.
Hozirda mazkur shaxslarga nisbatan jinoyat ishi qo‘zg‘atilib, tergov harakatlari olib borilmoqda.
Qozog‘iston fuqarosi A.K.ga nisbatan chora ko‘rish bo‘yicha qo‘shni davlat huquqni muhofaza qiluvchi organlari xabardor qilindi.
2024-yilning dekabr oyida Qozog‘iston janubida neft mahsulotlarini kontrabanda qilish uchun foydalanilgan O‘zbekistonga olib boruvchi tunnel topilgandi.
Izoh (0)