AQSH davlat kotibi Entoni Blinken va Armaniston tashqi ishlar vaziri Ararat Mirzoyan ikki mamlakat o‘rtasidagi strategik sheriklik bitimini imzoladi. Bu haqda Deutsche Welle xabar berdi.
Mazkur hujjat to‘rtta asosiy sohada keng qamrovli ikki tomonlama hamkorlikka asos soladi. Blinken sheriklik iqtisodiyot, xavfsizlik, mudofaa, demokratik islohotlar va ikki davlat fuqarolari o‘rtasidagi aloqalarni kengaytirish orqali rivojlantirilishini aytmoqda. Ilmiy-texnikaviy hamkorlikka, jumladan, tinch maqsadlardagi yadro sohasida hamkorlik imkoniyatlarini ochadigan “123-bitim” bo‘yicha ham muzokaralar bo‘lishi kutilmoqda.
Armaniston xavfsizligini mustahkamlash doirasida fevral oyida bojxona va chegara xizmati sohasidagi amerikalik mutaxassislar tashrif buyuradi. Harbiy hamkorlik qo‘shma mashg‘ulotlari orqali davom ettiriladi. Bundan tashqari, Yerevan xalqaro terrorizmga qarshi koalitsiyaga qo‘shilib, uning 88-ishtirokchisiga aylanadi.
Ararat Mirzoyan strategik sheriklik darajasiga chiqishni umumiy qadriyatlar va manfaatlarga asoslangan munosabatlarning tabiiy rivojlanishi, deb baholadi. U Vashingtonning Armaniston suvereniteti va hududiy yaxlitligini qo‘llab-quvvatlashining ahamiyatini alohida ta’kidladi. Entoni Blinken esa Vashington hamda Yerevan o‘rtasidagi munosabatlarning yangi formati butun Janubiy Kavkazning barqarorligiga xizmat qilishiga ishonch bildirdi.
Moskvaning reaksiyasi
Belarus, Qozog‘iston, Qirg‘iziston va Tojikistonni ham birlashtirgan Kollektiv xavfsizlik shartnomasi tashkiloti (KXSHT) doirasida Armanistonning asosiy hamkori bo‘lgan Rossiya Yerevanning AQSHning strategik sherigi bo‘lish qaroriga nisbatan ancha vazmin munosabatda bo‘ldi.
Rossiya tashqi ishlar vaziri Sergey Lavrov 14-yanvar kuni bo‘lib o‘tgan matbuot anjumanida bunday bitimning imzolanishi Yerevanning suveren huquqi ekani va Moskva boshqa davlatlarga kim bilan munosabat o‘rnatish kerakligini aytmasligini bildirdi. Lavrov hujjatning nomi va imzolanishi emas, balki hamkorlikning amaliy oqibatlari muhim ahamiyatga egaligini ta’kidladi.
Sergey Lavrov Moskva va Yerevan o‘rtasidagi munosabatlar qiyin davrni boshdan kechirayotganini e’tirof etib, muloqotni davom ettirish muhimligini bildirdi. Shuningdek, Ararat Mirzoyanning Moskvaga tashrifini e’lon qildi.
Izoh (0)