Qozog‘istonlik deputat Sergey Ponomarev mamlakatdagi har qanday masalani pulga hal qilish mumkinligini aytdi. Bu haqda Tengrinews xabar berdi.
Qonunchilik palatasida korrupsiyaga qarshi kurashish masalalari bo‘yicha qonun loyihasi ko‘rib chiqildi. Muhokama chog‘ida Ponomarev qozog‘istonliklar maishiy korrupsiyaga tez-tez duch kelishini aytdi.
Mamlakatimizda har qanday masalani pul bilan hal qilish mumkin. Oliy o‘quv yurtlarida o‘qituvchilar yaxshi baho uchun pora so‘raydi. Poliklinikalarda shifokorlar sifatli davolash uchun haq talab qiladi. Hatto bank sohasida ham kredit olish uchun, ayniqsa imtiyozli kredit bo‘lsa, pul berishga to‘g‘ri keladi.
Qonun loyihasida davlat xizmatchisi bo‘lmagan har qanday shaxsga noqonuniy mukofot berganlik uchun jinoiy javobgarlik joriy etish taklif qilinmoqda. Mantiqan, noqonuniy mukofot oluvchi ham, uni beruvchi ham javobgarlikka tortilishi kerak. Ammo bunday holatda qahvaxonadagi choychaqalarni ham jinoyat sifatida ko‘rsatish mumkin. Choychaqa berdingmi — pora uchun qamalding, dedi Ponomarev.
Majlis deputatlari korrupsiyaga qarshi kurashishga qaratilgan qonun loyihasini birinchi o‘qishda ma’qulladi. Hujjat pora olishni talab qilish, va’da berish yoki taklif qilish uchun jinoiy javobgarlikni nazarda tutadi. Korrupsiyaga qarshi siyosatni tartibga soluvchi Jinoyat kodeksi, Ma’muriy huquqbuzarliklar to‘g‘risidagi kodeks va boshqa bir qator qonunlarga tegishli tuzatishlar kiritiladi.
Bunday yondashuv kelishuv bosqichidayoq korrupsiyaviy xatti-harakatlarning oldini olish imkonini beradi, deb hisoblaydi rasmiylar.
Bundan tashqari, korrupsiyaga oid jinoyatlarda ishtirok etganlik uchun yuridik shaxslarning javobgarligi kuchaytirilmoqda. Belgilangan jarimalar o‘rniga, uning miqdoriga qarab, pora summasining 30 baravaridan 60 baravarigacha miqdorda jarimalar joriy etiladi.
O‘zbekistonda mart oyida korrupsiyaga qarshi kurashish bo‘yicha 2030-yilgacha mo‘ljallangan Milliy strategiya ishlab chiqilgan. Milliy strategiyani 2024—2025-yillarda amalga oshirish bo‘yicha yo‘l xaritasida 7 ta yo‘nalishda korrupsiyaga qarshi kurashish mexanizmlarini takomillashtirish bo‘yicha chora-tadbirlar belgilangan.
2024-yil dekabrida o‘tkazilgan tadqiqotda jamoatchilik va hukumatning korrupsiyaga munosabati baholangandi. Tadqiqot natijalariga ko‘ra, jamoatchilik ko‘pincha korrupsiyani poraxo‘rlik va qarindosh-urug‘chilik deb tushunadi. 50 foizdan ortiq respondentga ko‘ra, korrupsiya — bu mansabni suiisteʼmol qilish va qarindosh-urug‘chilik, 40 foizdan kamrog‘i uchun esa qimmatbaho sovg‘alar berishdir. Respondentlar korrupsiya keng tarqalgan sohalar sifatida sog‘liqni saqlash, ta’lim (ayniqsa, oliy ta’lim) va mahalliy hokimiyatni e’tirof etgan. O‘zbekistonda rahbarlik lavozimidagi 500 kishining korrupsiyaga moyilligini baholash rejalashtirilgan.
Izoh (0)