Qozog‘iston prezidenti Qosim-Jo‘mart To‘qayev energiya taqchilligi kuchayib borayotgan sharoitda mamlakatda birinchi AES qurilishini tezlashtirish zarurligini bildirdi.
U hukumatga yadro klasterini tashkil etish maqsadida atom sanoatini rivojlantirishning uzoq muddatli rejalarini ishlab chiqishni topshirdi.
O‘sib borayotgan energiya taqchilligi sharoitida birinchi AES qurilishini tezlashtirish va umuman olganda, mamlakatda yadro klasterini yaratishga kirishish lozim. Bu mamlakatimiz taraqqiyotini ta’minlash uchun muhim vazifadir, dedi To‘qayev hukumatning kengaytirilgan majlisida.
U hukumat va parlamentdan ikkinchi atom stansiyasi quriladigan joy bo‘yicha takliflar kutayotganini qo‘shimcha qildi.
Yana bir bor ta’kidlayman: mamlakatimizga yadro energiyasi zarur, busiz Qozog‘istonning izchil rivojlanishi shubha ostida qoladi, deya so‘zini davom ettirdi u.
2024-yil noyabr oyida Qozog‘istonda o‘tkazilgan referendumda ishtirokchilarning 71,12 foizi mamlakatdagi birinchi AES qurilishini qo‘llab-quvvatladi. AESni 2035-yilgacha mamlakatning janubi-sharqida, Ulken qishlog‘i yaqinida qurish rejalashtirilmoqda (janubiy hududlarda respublikaning boshqa qismlariga qaraganda energiya tanqisligi yuqoriroq). Loyihaning qiymati 10-12 milliard dollar atrofida baholanmoqda.
Qozog‘iston yetakchisi AES qurilishiga jahon kompaniyalari xalqaro konsorsiumini jalb qilishni eng maqbul variant sifatida baholadi. Loyihada ishtirok etish uchun Rossiyaning “Rosatom” davlat korporatsiyasi, Xitoyning CNNC, Janubiy Koreyaning KHNP va Fransiyaning EDF kompaniyalari da’vogarlik qilmoqda.
Qozog‘iston Milliy iqtisodiyot vaziri o‘rinbosari Arman Kasenov mamlakatda atom elektr stansiyasi muddatli to‘lov evaziga qurilishi mumkinligini aytgan edi.
Izoh (0)