2024-yil 1-mart kuni O‘zbekiston Respublikasi Prezidenti tomonidan imzolangan “Sug‘urta xizmatlari bozorini yanada rivojlantirishning kompleks chora-tadbirlari to‘g‘risida”gi PQ–108-son qarori mamlakatimizda sug‘urta tizimini tubdan yangilashga qaratilgan muhim qadam bo‘ldi. Ushbu qaror bilan sug‘urta sohasida kechiktirib bo‘lmaydigan islohotlar belgilanib, ularni amalga oshirishga doir aniq mexanizmlar ko‘rsatib o‘tilgan.
Ushbu qaror ijrosini ta’minlash maqsadida 2025-yil 23-iyul kuni Vazirlar Mahkamasi tomonidan “Sug‘urta xizmatlari bozorini yanada rivojlantirishning kompleks chora-tadbirlari to‘g‘risida”gi qaror ijrosini ta’minlashga qaratilgan 458-sonli qaror qabul qilindi. Ushbu qaror doirasida transport vositalari egalarining fuqarolik javobgarligini majburiy sug‘urtalash tizimida bir qator muhim o‘zgarishlar amalga oshirildi.
Asosiy o‘zgarishlar
Aktuar hisob-kitoblar asosida sug‘urta tariflari qayta ko‘rib chiqildi.
Sug‘urta mukofotlari va sug‘urta summalari bozor mexanizmlariga muvofiqlashtirildi. Bu nima degani?
Aktuar hisob-kitoblar – bu sug‘urta sohasida risklar va majburiyatlarni baholash, kelgusida yuzaga chiqishi mumkin bo‘lgan sug‘urta to‘lovlarini ta’minlash uchun zarur mablag‘ni aniqlashga xizmat qiladigan matematik va statistik usullar majmuasidir.
Sug‘urta summasi sezilarli darajada oshirildi
Amaldagi 40 million so‘mlik sug‘urta summasi 2026-yil 1-yanvardan boshlab 80 million so‘mgacha oshirildi. Endi YTH natijasida yetkazilgan zararlar — shaxs hayoti, sog‘lig‘i yoki mol-mulkiga keltirilgan zarar to‘liqroq qoplanishi mumkin bo‘ladi.
Shu bilan birga, sug‘urta mukofoti (ya’ni sug‘urta polisini rasmiylashtirishda fuqaro to‘laydigan summa) 160 ming so‘m (viloyatlarda) va 192 ming so‘m (Toshkent shahrida) etib belgilandi. Bu transport vositasini bir marta yuvish xizmati narxi bilan taqqoslanganda, juda ham muvofiq hisoblanadi.
Polislar bo‘yicha cheklangan va cheklanmagan mexanizm joriy etildi
Bunda haydovchilar soniga qarab turli sug‘urta polislarini rasmiylashtirish imkoni yaratildi. Aybdor haydovchining sug‘urta kompaniyasi tomonidan sug‘urta nizolarini ko‘rib chiqish tartibi aniqlashtirildi.
Sug‘urta to‘lovlarini kafolatlash jamg‘armasi vakolatlari kengaytirildi
Endilikda Jamg‘arma transport vositalariga oid majburiy sug‘urta yuzasidan huquqiy maslahat berish hamda YTH to‘g‘risidagi xabarnoma bilan bog‘liq adjasterlik xizmatlarini ham ko‘rsatadi.
Nazorat va axborot tizimi takomillashtirildi
Majburiy sug‘urta shartlariga rioya etilishini nazorat qilish organlari belgilandi;
Yagona avtomatlashtirilgan axborot tizimi yuritiladi;
Manfaatdor davlat organlari o‘rtasida elektron ma’lumot almashinuvi yo‘lga qo‘yiladi.
Yagona sug‘urta billing tizimi joriy etiladi
2026-yil 1-apreldan boshlab sug‘urta mukofotlarining tushumi markazlashtirilgan holda hisobga olinishi ta’minlanadi.
Ushbu islohotlar nafaqat sug‘urta kompaniyalari, balki fuqarolar uchun ham keng imkoniyatlar yaratishga qaratilgan. Eng muhimi, sug‘urta sohasida aniqlik, hisob-kitobning shaffofligi va mijozlarning manfaatlarini himoya qilish kabi tamoyillar mustahkamlanmoqda.
“O‘zbekinvest” eksport-import sug‘urta kompaniyasi sug‘urta bozoridagi islohotlarni qo‘llab-quvvatlaydi va ushbu jarayonda faol ishtirok etishga tayyor ekanini yana bir bor ta’kidlaydi. Mazkur o‘zgarishlar, shubhasiz, O‘zbekiston sug‘urta bozorini yangi bosqichga olib chiqadi.
Reklama huquqi asosida.
Izoh (0)