Qozog‘iston xorijliklar uchun to‘lov kartalarining amal qilish muddatini 12 oygacha chekladi. Qozog‘iston moliya bozorini tartibga solish va rivojlantirish agentligi qonunchilikka shunday o‘zgartirish kiritdi.
Chora-tadbirlar noqonuniy faoliyatda, shu jumladan giyohvand moddalar va raqamli aktivlar aylanmasida bank xizmatlaridan foydalanish xavfini kamaytirishga qaratilgan.
Amal qilish muddati bo‘yicha istisno tadbirkorlik subyektlari, diplomatik xodimlar va investorlar uchun chiqarilgan to‘lov kartalariga amal qiladi. Bitta mijoz tomonidan rasmiylashtirish mumkin bo‘lgan to‘lov kartalari soni ham beshtagacha qisqartirildi. Bunda ulardan ko‘pi bilan ikkitasi kredit bo‘lishi mumkin. Ilgari bu bo‘yicha limit o‘nta karta edi. Bolalar uchun qo‘shimcha kartalar va bank qarzlarini berish yoki qaytarish uchun kredit kartalari hisobga olinmaydi.
Qozog‘iston norezidentlari uchun kartalarni berish talablarini 2023-yil oktyabr oyida kuchaytirish rejalashtirilgan edi. O‘shanda mamlakat Milliy banki norezidentlarga kartani rasmiylashtirish uchun vaqtincha yoki doimiy yashash uchun ruxsatnoma taqdim etishni talab qiladigan tuzatishlarni taklif qildi. Shuningdek, to‘lov tashkiloti ustav kapitalining eng kam miqdorini besh baravarga oshirish rejalashtirilgan edi.
Izoh (0)