Мутахассислар Қозоғистондан Россияга етказиб берилаётган товуқда листерия бактериясини аниқладилар. Бу бактерия организмга тушганда ўлимга олиб келиши мумкин. Бу ҳақда Росселхознадзор хабар қилди.
Журналистларнинг маълумотларига кўра, Россия ҳудудига гўштни “Макинская птицефабрика” етказиб беради. Ушбу корхона қўшни республикадаги энг йирик товуқ ишлаб чиқарувчиси бўлиб, Ўзбекистон ва Қирғизистонни ҳам маҳсулот билан таъминлайди.
Хабарда айтилишича, Росселхознадзор ходимлари Олтой ўлкасининг Барнаул шаҳрида гўшт партиясидан намуна олишган. Товуқ лаборатория текширувига юборилган ва мутахассислар унда листерия мавжудлигини аниқлашган.
Гўшт мусодара қилинди, Қозоғистондан келтирилган маҳсулотлар эса кучайтирилган назоратга олинди, дейилади хабарда.
Бундан ташқари, Росселхознадзор бошқа ишлаб чиқарувчиларнинг маҳсулотлари устидан ҳам назоратни кучайтирди. Компаниялардан улар етказиб бераётган товуқнинг истеъмолчилар учун хавфсиз эканлигини тасдиқлаш талаб қилинди.
Листерия — хавфли юқумли касаллик листериозни келтириб чиқарувчи бактерия. Бу касаллик одамнинг марказий асаб тизими ва репродуктив органларини зарарлайди, охир-оқибат ўлимга олиб келиши мумкин.
Биринчи навбатда хавф гуруҳига ҳомиладор аёллар, кексалар, чақалоқлар ва иммунитет тизими заиф бўлган одамлар киради. Листериознинг яширин даври 90 кунгача чўзилиши мумкин.
Изоҳ (0)