Qozog‘iston prezidenti Qosim-Jo‘mart To‘qayev Rossiya armiyasi yengilmas ekani, Ukraina esa G‘arb yordamida hech bo‘lmaganda mag‘lubiyatga uchramaslikka intilyotganini aytdi. Bu haqda u Ana Tii gazetasiga bergan intervyusida ma’lum qildi.
To‘qayevning so‘zlariga ko‘ra, AQSHning saylangan prezidenti Donald Tramp telefon orqali suhbat chog‘ida uning urush borasidagi qarashlari bilan qiziqqan.
“Vaziyat o‘ziga xos: Rossiya harbiy jihatdan yengilmas, Ukraina esa G‘arb ittifoqchilari yordamida urushda turishga, hech bo‘lmaganda, mag‘lub bo‘lmaslikka umid qilmoqda. Shuning uchun u muammoning go‘yat murakkabligini ta’kidladi, uning yechimi qarama-qarshi davlatlar rahbarlarining va, albatta, jahon qudrati yetakchisi sifatida Trampning xohish-irodasiga bog‘liq”, dedi Qozog‘iston prezidenti.
U Qozog‘iston doimo tinchlikka erishish uchun muzokaralar tarafdori bo‘lganini ta’kidladi. To‘qayev, shuningdek, Ostona “vositachilikka da’vogar emas”ligini, ammo “xalqaro muammolarni hal etishda doim yordamga shay” ekanini bildirdi.
Rossiya delegatsiyasining Qozog‘istonga tashrifini muhokama qilar ekan, u Rossiya prezidenti Vladimir Putinni “tajribali davlat arbobi” deb atadi. Uning fikricha, Putin “Qozog‘istonning o‘ziga xosligini va mamlakatning Markaziy Osiyo mintaqasidagi eng yirik iqtisodiyot sifatidagi muhim ahamiyatini yaxshi anglaydi”.
Qozog‘iston prezidenti ilgari ham Rossiyani harbiy jihatdan yengilmas deb ta’kidlagan edi. Uningcha, bu Rossiyaning harbiy salohiyati, aholining prezident Vladimir Putinni qo‘llab-quvvatlashi va tarixiy omillar bilan izohlanadi.
Izoh (0)