Toshkent viloyatining Toshkent tumanida joylashgan “Navoiy” chegara bojxona posti (Zangiota chegara o‘tkazish punkti) 27-yanvardan sinov rejimida ish boshladi. Bu haqda Bojxona qo‘mitasi matbuot xizmati xabar berdi.
Maʼlum qilinishicha, bojxona postida avtobus va yengil avtomashinalar hamda ularda harakatlanayotgan yo‘lovchilar uchun alohida yo‘laklar tashkil etilgan.
Bojxona postiga tutash hududda bir vaqtda 500 dan ortiq mashinalar va 100 dan ortiq avtobuslarni qabul qilish imkoniyatiga ega avtoturargoh barpo etildi. Unda xalqaro yo‘nalishda harakatlanayotgan avtobus va yengil avtomashinalar, shuningdek, mahalliy yo‘nalishdagi yo‘nalishli jamoat transportlari hamda taksi xizmatlari yo‘lga qo‘yilgan.
“Avtoturargohda transport vositalari uchun kutish joylari, fuqarolar uchun tez tayyor bo‘luvchi tamaddixonalar, kafe va boshqa maishiy va ijtimoiy xizmatlar, bundan tashqari, xalqaro yo‘nalishdagi avtotransport vositalari uchun shaffof elektron navbat tizimi yo‘lga qo‘yiladi”, deyiladi xabarda.
2022-yilning oktyabr oyida Qozog‘iston va O‘zbekiston chegarasidagi Zangiota—Qoplonbek avtoyo‘l o‘tkazish punkti 19 oyga yopilishi haqida xabar berilgandi.
Avvalroq O‘zbekiston—Qozog‘iston chegarasidagi “Dovud ota” postidan harakatlanish 1-fevraldan boshlab uch oyga to‘xtatilishi haqida xabar berildi.
Izoh (0)