Avvalroq Tojikiston madaniyat vaziri Matlubaxon Sattoriyon Amerikaning CNN telekanalining Abu Ali ibn Sino o‘zbek olimi sifatida tilga olingan materialiga munosabat bildirib, Ibn Sinoning tojikligini da’vo qilgandi. O‘zbekiston jurnalistika va ommaviy kommunikatsiyalar universiteti rektori Sherzodxon Qudratxo‘ja ushbu holat bo‘yicha izoh berdi.
Sherzodxon Qudratxo‘ja Tojikiston madaniyat vaziri Matlubaxon Sattoriyonga o‘zbek-tojik do‘stligi ko‘p ming yilga borib taqalishini eʼtirof etib, o‘z hurmatini izhor qilgan.
Ammo buyuk faylasuf Suqrot aytganidek, Aflotun manim do‘stim, biroq haqiqat ustundir. Birinchidan, Markaziy Osiyo davlatlari endi haqiqatdan ham birlashayotgan bir tarixiy paytda, o‘zaro chegaralar ochilib, barcha sohalarda mukammal hamkorlik rivojlanayotganda barchamiz aytayotganimizni yetti o‘lchab bir kesib gapirishimiz kerak, albatta”, deb yozadi O‘zJOKU rektori.
Qudratxo‘ja shu mavzuda bahs ochilgan ekan, mintaqa tarixini puxta o‘rganganda, IX-X asrlarda mintaqada O‘zbekiston, Qozog‘iston, Tojikiston yoki Qirg‘iziston deb tavsiflanish bo‘lmaganini eʼtirof etgan.
U o‘sha zamonlardagi ilm-fanning va maʼrifatning yuksalishi, renessans davrining cho‘qqiga chiqishining bosh omillaridan biri mintaqadagi bir jo‘g‘rofiy hudud qamrovidagi yaratilgan erkin muhit bo‘lganini taʼkidladi.
Bugungi kunda internetning istalgan qidiruv tizimiga murojaat qilsangiz, Abu Ali Ibn Sino qaysi mamlakat farzandi deganda: Abu Ali Ibn Sino (980-1037), mashhur tabib, faylasuf, matematik va olim, Buxoro yonida tug‘ilgan. Uning tug‘ilgan joyi hozirgi kunda O‘zbekiston hududiga to‘g‘ri keladi. Shu sababli Ibn Sino Markaziy Osiyo farzandi hisoblanadi, deya qo‘shimcha qiladi Qudratxo‘ja.
Shuningdek, Sherzodxon Qudratxo‘ja Abu Ali Ibn Sinoning millati to‘g‘risidagi savol qanchalik o‘rinsiz bo‘lsa-da, bunday yondashuv ikki tomonlama munosabatlarga salbiy taʼsir qilmay qolmasligini alohida yozdi.
Va shubhasiz, uchinchi taraf bunday hollardan o‘zining g‘araz maqsadlarida foydalanadi. Biz bugun katta mintaqada yashar ekanmiz, ilm-fan, adabiyot, maʼrifat sohasida cho‘qqiga chiqqan ulug‘ olimlarni seniki, meniki demasdan bir zaminda yashagan bobolarimizning munosib farzandlari bo‘lishimiz kerak, deya qo‘shimcha qilgan siyosiy fanlar doktori.
Izoh (1)
U qaysi millat boʻlishidan qatʼiy nazar u bizning bobomiz bizda oʻsha davrdagidek ilmga etibor boshqa joyda boʻlmagan bo'lmaydi ham chunki ashi davrda din bilan dunyoviy ilmni qoʻsha olganmiz bu tojikning madaniyat vazirining gapi huddiki bolani oʻgay ona tarbiyalaydida keyin yigirma yildan keyin haqiqiy onasi kelsa bola haqiqiy onasiga yaqin ham yoʻlagisi kelmaganidek gap bu tojik vaziri aqlini ishlatmagan