Azerbaijan Airlines aviakompaniyasining 8243-reysdagi samolyoti Suriyadan Rossiyaga olib kelingan “Pansir-S1” zenit-raketa majmuasidan uchirilgan raketa bilan urib tushirilgan. Bu haqda tekshiruv jarayoni bilan tanish bo‘lgan ishonchli Rossiya manbalariga tayanib, Ozarbayjonning AnewZ xalqaro yangiliklar kanali va Euronews xabar berdi.

AnewZ o‘z manbalariga tayanib xabar berishicha, 2024-yilning 25-dekabr kuni Grozniyga qo‘nayotgan Ozarbayjon samolyotiga qarshi radioelektron kurash tizimlari qo‘llanilgan. Bu Qozog‘istonning Oqtov aeroporti hududida qulashidan oldin boshqaruv tizimlarida jiddiy uzilishlarga olib kelgan.

AnewZ ma’lumotlariga ko‘ra, rossiyalik tergovchilar raketani uchirgan shaxs va buyruq bergan zobitning kimligini aniqlaganlar.

Ozarbayjondagi diplomatik manbalarning ma’lum qilishicha, Boku bu ishning “shunchaki yopiq qolib ketishiga” yo‘l qo‘ymoqchi emas va Rossiyadan layner halokatida aybdorlarni javobgarlikka tortishni qat’iy talab qilmoqda.

Agar Moskva 38 yo‘lovchi halok bo‘lgan va 29 kishi jarohatlanib omon qolgan fojia uchun javobgarlikni o‘z zimmasiga olishni rad etsa, bu xalqaro sudlarga murojaat qilishni ham o‘z ichiga oladi.

Qozog‘istondagi aviahalokat

25-dekabr kuni Bokudan Grozniyga uchayotgan Ozarbayjon havo yo‘llari (AZAL)ning Embraer samolyoti Oqtov yaqinida halokatga uchradi. Samolyot bortida 67 kishi, jumladan, besh nafar ekipaj aʼzosi bo‘lgan. Ulardan 42 nafari Ozarbayjon, 16 nafari Rossiya, 6 nafari Qozog‘iston, 3 nafari Qirg‘iziston fuqarolaridir. Hodisa oqibatida jami 38 kishi halok bo‘ldi.

29-dekabr kuni barcha 17 xalqaro ekspert, jumladan, Xalqaro fuqaro aviatsiyasi tashkiloti (ICAO), Braziliya aviahalokatlarni tekshirish va oldini olish markazi (CENIPA), Davlatlararo aviatsiya qo‘mitasi (IAC) va Embraer ishlab chiqaruvchi kompaniya vakillari AZAL samolyoti halokati sabablarini tekshirish uchun Oqtovga yetib keldi.

30-dekabr kuni Qozog‘iston Ozarbayjon samolyotining registratorlarini CENIPA’ga o‘rganish uchun yubordi.

Ozarbayjon prezidenti Ilhom Aliyev samolyot Grozniy yaqinida tashqi ta’sir oqibatida shikastlangan va boshqaruvni yo‘qotganini ma’lum qilgan.

“Faktlar shundan iboratki, Ozarbayjon fuqarolik samolyoti Rossiya hududida, Grozniy shahri yaqinida tashqi ta’sir oqibatida shikastlangan va deyarli boshqaruvni yo‘qotgan. Shuningdek, bizning samolyotimiz radioelektron kurash vositalari yordamida boshqarib bo‘lmaydigan holatga tushirilganini ham bilamiz. Bu samolyotga yetkazilgan birinchi zarar hisoblanadi”, dedi u Ozarbayjon televideniyesiga bergan intervyusida.