Jinoyatchilar orasida “Dikiy Arman” nomi bilan tanilgan Arman Jumageldiyev Qozog‘istonda 2022-yil yanvar oyida ommaviy tartibsizliklar uyushtirganlikda ayblanib, 20 yilga ozodlikdan mahrum qilindi. Bu haqda Tengrinews xabar berdi.
Barcha sud majlislari va hukmlar yopiq rejimda o‘tkazildi. Sud qarori bilan Jumageldiyev uyushgan jinoiy guruhni tashkil etish va unga rahbarlik qilish, qurolli bosqinchilik, ommaviy tartibsizliklarni uyushtirish, odam o‘g‘irlash va qonunga xilof ravishda ozodlikdan mahrum qilishda aybdor deb topildi. Sud “Dikiy Arman” laqabli shaxsni 20 yil muddatga ozodlikdan mahrum etish jazosiga hukm qildi.
“Ommaviy tartibsizliklarning boshqa ishtirokchilari — Jumageldiyev to‘dasi a’zolari (jami 13 kishi) ga 10 yildan 15,5 yilgacha, to‘da tarkibiga kirmagan boshqa ishtirokchilar esa 1,5 yildan 7 yilgacha ozodlikdan mahrum etildi”, deyiladi xabarda.
Sobiq deputat, tadbirkor Qayrat Qudaybergen 2022-yil 23-aprelda Jumageldiyev bilan birga yanvardagi ommaviy tartibsizliklarda ishtirok etish uchun odamlarni yig‘ishda gumonlanib hibsga olingan. Tergov ma’lumotlariga ko‘ra, ular to‘plagan guruh maydonga chiqib, u yerda namoyishchilarni Jumageldiyev atrofida birlashtirishga, maydonda tezkor shtab tashkil etishga va hukumatga yagona talablarni qo‘yishga harakat qilgan.
“Amanat” partiyasi (sobiq “Nur Otan”) Qudaybergenni o‘z safidan chiqarib yuborgan va Olmaota Maslahati deputati mandatidan mahrum qilgan. Milliy xavfsizlik qo‘mitasi beshinchi departamentining sobiq rahbari polkovnik Ruslan Iskakov yanvar voqealari paytida “Dikiy Arman” koordinatori bo‘lgan. Qayrat Qudaybergan 8 yilga, Ruslan Iskakov esa 15 yil 6 oyga ozodlikdan mahrum etildi.
“Dikiy Arman”ning hibsga olingani 7-yanvar kuni ma’lum bo‘lgandi. U 5 kishidan iborat jinoiy guruhi bilan birgalikda maxsus operatsiya davomida Olmaotada qo‘lga olingan. Qo‘lga olish chog‘ida gumonlanuvchilardan turli marka va kalibrli to‘rtta yarim avtomat to‘pponcha, o‘q-dorilar, sovuq qurol va zirhli avtomashina musodara qilingan.
Bosh prokuratura ma’lumotiga ko‘ra, to‘da a’zolari yanvar voqealarida 24 kishini o‘g‘irlab ketgan va ushlab turgan, ulardan biri vafot etgan. Shuningdek, huquq-tartibot idoralari xodimlaridan qurollar o‘g‘irlab ketilgan.
“Qonli yanvar” voqealari
2022-yil yanvar oyi boshida Qozog‘istonda ommaviy tartibsizliklar yuz berdi, ularning ishtirokchilari politsiya va harbiy xizmatchilarga hujum qildi. To‘qayev yordam so‘rab KXSHTga murojaat qildi. 7-yanvarga kelib vaziyat barqarorlashdi, 19-yanvardan butun mamlakat bo‘ylab favqulodda holat bekor qilindi. Rasmiy maʼlumotlarga ko‘ra, ushbu hodisalar oqibatida 238 kishi halok bo‘lgan, 4,5 mingdan ortiq kishi jarohatlangan.
Izoh (0)