O‘zbekiston avtomobil sanoatini faol rivojlantirishda davom etmoqda. Xalqaro brendlar bilan strategik sheriklik va avtomobil yig‘ish, ishlab chiqarilishiga keng ko‘lamli sarmoyalar sohada mahalliylashtirish hamda texnologik o‘sishni chuqurlashtirish uchun mustahkam poydevor yaratmoqda. Ushbu jarayonning asosiy harakatlantiruvchi kuchlardan biri ADM Global kompaniyalar guruhi bo‘lib, u yuqori texnologiyali ishlab chiqarishlarni yaratish va global hamkorlarni jalb qilish bo‘yicha keng qamrovli strategiyani amalga oshirmoqda. Bunday qadamlar natijasida mamlakat xalqaro sarmoyadorlarning e’tiborini tobora ko‘proq jalb etib, yangi sanoat klasterlarini shakllantirmoqda hamda mintaqaviy avtosanoat markazi maqomini ishonch bilan mustahkamlamoqda.
Kia Sonet: O‘zbekistonda sanoat ishlab chiqarishi
ADM Global kompaniyalar guruhiga kiruvchi ADM Jizzakh zavodi asosiy mahalliylashtirish maydonchasiga aylanib, u yerda 2024-yil mart oyida Kia Sonet modelini sanoat miqyosida (CKD) ishlab chiqarish boshlandi.
Loyihaga kiritilgan sarmoyalarning umumiy hajmi — 258,9 million AQSH dollari.
Shundan:
- 112,8 million AQSH dollari — to‘g‘ridan-to‘g‘ri sarmoyalar;
- 146,1 million AQSH dollari — jalb qilingan mablag‘lar.
CKD liniyasining loyihaviy quvvati yiliga 100 000 donagacha avtomobillarni tashkil etadi.
Qo‘shimcha ravishda natija — zavod bazasida avtomobil komponentlari klasterini yaratish.
Korxonada Kia Sonet’dan tashqari, SKD texnologiyasi bo‘yicha Kia, Chery, Haval va Hyundai Truck & Bus brendlarining avtomobillari yig‘iladi. 2021-yilda ishlab chiqarish maydonchasi ishga tushirilganidan buyon ADM Jizzakh’da 83 000 dan ortiq avtomobillar ishlab chiqarilgan.
Moliyaviy yordam
Loyihani moliyalashtirish O‘zbekistonning yetakchi banklari — “Asakabank” AJ, “O‘zmilliybank” AJ, “O‘zsanoatqurilishbank” ATB, “Ipak Yo‘li” AITB, “InFinBank” AJ, shuningdek, bir qator xalqaro moliya institutlari, jumladan, Yevropa tiklanish va taraqqiyot banki (YTTB), Yevropa investitsiya banki (YIB), Xalqaro tiklanish va taraqqiyot banki (XTTB), Neft eksport qiluvchi mamlakatlar tashkiloti (OPEK), “SAMURAI Co, Ltd”, “Cargill, Inc”, International Development Association (IDA) va boshqalar tomonidan amalga oshirildi.
Ushbu mablag‘lar nafaqat ishlab chiqarish quvvatlarini rivojlantirishga, balki yakuniy iste’molchilar uchun hamyonbop avtokreditlash dasturlarini yaratishga ham yo‘naltirilgan.
Kelgusi rejalar
ADM Jizzakh ishlab chiqarish siklini kengaytirish va chuqurlashtirishga sarmoya kiritishda davom etmoqda:
- yaqin kunlarda presslash va kataforez sexlarida ishlab chiqarish yo‘lga qo‘yiladi.
- payvandlash, bo‘yash va yig‘ish uchastkalarini rivojlantirish davom ettiriladi.
- komponentlar importiga qaramlikni kamaytirish va mahalliylashtirish darajasini oshirishga e’tibor qaratiladi.
Bundan tashqari, 2023-yil boshidan buyon ADM Global kompaniyalar guruhi savdo moliyalashtirishini jalb qilishda sezilarli yutuqlarga erishdi. Xitoy va Koreyaning yetakchi savdo kompaniyalaridan olingan mablag‘larning umumiy hajmi 134,5 million AQSH dollarini tashkil etdi. Ushbu mablag‘lar savdo operatsiyalarini rivojlantirish va xoldingning bozordagi mavqeini mustahkamlashga yo‘naltirilgan.
Shuningdek, tez orada Yaponiyaning yirik korporatsiyasi bilan qo‘shma korxona tashkil etilishi e’lon qilinishi kutilmoqda, bu kengayish strategiyasining navbatdagi qadami bo‘lib, biznes uchun yangi imkoniyatlar ochadi.
Xulosa
ADM Global yuqori texnologiyali ishlab chiqarishlarni tashkil etish va xalqaro hamkorlarni jalb qilish bo‘yicha keng qamrovli strategiyani amalga oshirmoqda. Bunday sa’y-harakatlar tufayli O‘zbekiston barqaror sarmoya muhitini shakllantirib, yangi sanoat klasterlari uchun imkoniyatlar ochib, mintaqaviy avtosanoat markazi maqomini ishonch bilan mustahkamlamoqda.
Izoh (0)