O‘zbekistonda prokurorlar energoresurslardan behuda foydalangan aholi va tadbirkorlarni javobgarlikka tortmoqda. Bu haqda Bosh prokuratura xabar berdi.
Mamlakatda yoqilg‘i-energiya resurslaridan behuda foydalanish bilan bog‘liq holatlarni aniqlashga qaratilgan reydlar o‘tkazilmoqda. Xususan, joriy yil o‘tgan davrida 1 633 ta holatda gaz va elektr tokidan behuda foydalanishlar aniqlanib, aybdor shaxslarga nisbatan maʼmuriy ishlar qo‘zg‘atilgan. Shundan 172 ta holat Toshkent shahrida qayd etilgan.
Shahardagi “A.T.” MCHJga qarashli turistik xizmat ko‘rsatish shoxobchasida 0,15 kVt quvvatdagi elektr energiyasidan kunning yorug‘ vaqtida foydalanish holati aniqlanib, tegishli hujjatlar rasmiylashtirilgan, deyiladi manbada.
Qayd etilishicha, respublikada energiya resurslaridan behuda foydalanish holatlarining oldini olish bo‘yicha 46 983 ta profilaktik tadbirlar o‘tkazilgan.
“Hurmatli tadbirkorlar va fuqarolar, energiya resurslaridan oqilona foydalaning. Nazorat organlari tomonidan tabiiy gaz va elektr energiyasidan behuda foydalanish holatlarini aniqlash borasida reyd tadbirlari olib borilmoqda. Shuni unutmangki, energoresurslardan behuda foydalanish uchun javobgarlik mavjud”, deya ogohlantirilgan isteʼmolchilar.
Avvalroq Bosh prokuratura 2025-yil yanvar—iyun oylarida yoqilg‘i-energetikadan foydalanishda 67 mingdan ortiq noqonuniy holatlar aniqlanib, 758 mlrd so‘m zarar undirilganini maʼlum qilgandi.
Izoh (0)