Qozog‘iston bosh vaziri Kanat Bozumbayev halokatga uchragan Azerbaijan Airlines (AZAL) samolyoti uchuvchilarining avval e’lon qilingan muloqotlari haqiqiy emasligini aytdi.

Men tarmoqlarda tarqalgan yozuvni tingladim, menimcha, bu ko‘proq yerda olib borilgan suhbatlar edi. Men u yerda ekipaj a’zolarining suhbatlarini eshitmadim. Qora qutida kapitan, uchuvchi va ekipaj a’zolari olib borgan barcha muloqotlar mavjud.  Shundan kelib chiqib, men bu tergov guruhimizdan sizib chiqmagan degan xulosaga keldim, dedi bosh vazir.

Bozumbayevning so‘zlariga ko‘ra, e’lon qilingan ma’lumotlar bortdagi o‘z-o‘zidan yozish qurilmalaridan olingan ma’lumotlardan farq qiladi.

Agar biz ma’lumotlar sizib chiqishini qora qutilar rasshifrovkasi sifatida baholamasak, bu “tarqalish” manbasini qidirishning nima keragi bor? Internetda kimdir biror narsa e’lon qilgani, bu haqiqat degani emas. E’lon qilingan narsada katta farq bor. Shuning uchun rasmiy manbalarni kuting, dedi u.

Vazir, shuningdek, Qozog‘iston, Ozarbayjon, Rossiya va Braziliya ekspertlari avtomatik tarzda yozuvchi qurilmalarni o‘qish uchun teng imkoniyatga ega ekanligini eslatdi. Layner parchalari xalqaro ekspertlar tomonidan ham ko‘rib chiqildi.

Joriy yilning 15-yanvar kuni Baza Telegram kanalida uchuvchilarning Rossiyadagi dispetcherlar bilan suhbatlarining to‘liq tafsilotlari aks etgan material e’lon qilingan edi. Unga ko‘ra, dispetcherlarga bortdagi kislorod balloni portlagani va gidravlika ishdan chiqqani haqida xabar berilgan.

Avvalroq Qozog‘iston Transport vazirligi tergovning rasmiy ma’lumotlari olinmaguncha Baza ma’lumotlariga izoh berishdan bosh tortgandi.

Qozog‘istondagi aviahalokat

25-dekabr kuni Bokudan Grozniyga uchayotgan Ozarbayjon havo yo‘llari (AZAL)ning Embraer samolyoti Oqtov yaqinida halokatga uchradi. Samolyot bortida 67 kishi, jumladan, besh nafar ekipaj aʼzosi bo‘lgan. Ulardan 42 nafari Ozarbayjon, 16 nafari Rossiya, 6 nafari Qozog‘iston, 3 nafari Qirg‘iziston fuqarolaridir. Hodisa oqibatida jami 38 kishi halok bo‘ldi.

29-dekabr kuni barcha 17 xalqaro ekspert, jumladan, Xalqaro fuqaro aviatsiyasi tashkiloti (ICAO), Braziliya aviahalokatlarni tekshirish va oldini olish markazi (CENIPA), Davlatlararo aviatsiya qo‘mitasi (IAC) va Embraer ishlab chiqaruvchi kompaniya vakillari AZAL samolyoti halokati sabablarini tekshirish uchun Oqtovga yetib keldi.

30-dekabr kuni Qozog‘iston Ozarbayjon samolyotining registratorlarini CENIPA’ga o‘rganish uchun yubordi.

Ozarbayjon prezidenti Ilhom Aliyev samolyot Grozniy yaqinida tashqi ta’sir oqibatida shikastlangan va boshqaruvni yo‘qotganini ma’lum qilgan.

“Faktlar shundan iboratki, Ozarbayjon fuqarolik samolyoti Rossiya hududida, Grozniy shahri yaqinida tashqi ta’sir oqibatida shikastlangan va deyarli boshqaruvni yo‘qotgan. Shuningdek, bizning samolyotimiz radioelektron kurash vositalari yordamida boshqarib bo‘lmaydigan holatga tushirilganini ham bilamiz. Bu samolyotga yetkazilgan birinchi zarar hisoblanadi”, dedi u Ozarbayjon televideniyesiga bergan intervyusida.